İordaniya kralı II Abdullah bildirib ki, ölkə Qəzza zolağından fələstinli qaçqınları qəbul edə bilməz, bu, krallıq üçün qırmızı xətt olan bir məsələdir. Elchi.az xəbər verir ki, onun sözləri dövlət başçısının saytında yer alıb.
Monarx qeyd edib ki, o, bu bəyanatı təkcə İordaniya adından deyil, həm də Misir adından verir. Bu problem Qəzza və İordan çayının qərb sahilindəki Fələstin ərazilərində həll olunmalıdır, deyən II Abdullah bunun başqa ölkələrə tətbiq edilməməsi lazım olduğunu vurğuladı.
Kral bildirib ki, fələstinliləri və israilliləri birləşdirəcək, onlara dinc şəkildə birgə yaşamağa və işləməyə imkan verəcək düzgün siyasi üfüq tapmaq lazımdır. O qeyd edib ki, Qəzza zolağında hərbi əməliyyatların genişləndirilməsi təhlükəsi realdır və bunun nəticələri beynəlxalq ictimaiyyət üçün ağır olacaq.
Bundan əvvəl Avropa Şurasının rəhbəri Çarlz Mişel bildirib ki, hazırda Yaxın Şərqdə münaqişənin kəskinləşməsi Avropaya qeyri-qanuni miqrantların yeni axınına səbəb ola bilər.
Havar Şəfiyeva
