Səudiyyə Ərəbistanının paytaxtı Ər-Riyadda İran prezidenti İbrahim Rəisi ilə Səudiyyə Ərəbistanının vəliəhd şahzadəsi Məhəmməd bin Salman ilk dəfə görüşüb.
Elchi.az xəbər verir ki, İran prezidentinin yazılı açıqlamasına görə, İslam Əməkdaşlıq Təşkilatına (İƏT) üzv ölkələrin dövlət başçılarının Qəzzada vəziyyətlə bağlı fövqəladə iclasında iştirak etmək üçün Səudiyyə Ərəbistanının paytaxtı Ər-Riyada səfər edən dövlət başçısı, Bin Salmanla sammitin kənarında görüşüb.
Rəis və Bin Salman arasındakı görüş İran və Səudiyyə Ərəbistanı dövlət başçıları arasında son 11 ildə ilk təkbətək görüş olub.
İkitərəfli münasibətlərin inkişafı və regional əməkdaşlığın müzakirə edildiyi görüşdə iki lider bu məsələləri daha sonra ətraflı müzakirə etmək barədə razılığa gəliblər.
İran və Səudiyyə Ərəbistanı martın 10-da 7 ildən sonra münasibətləri normallaşdırmaq qərarına gəlib. Rəisi və Salman münasibətlərin qurulmasından sonra ilk dəfə oktyabrın 12-də telefonla görüşüblər.
İran prezidenti Qəzzadakı vəziyyəti müzakirə etmək üçün Səudiyyə Ərəbistanında keçirilən İslam Əməkdaşlıq Təşkilatının (İƏT) Fövqəladə Zirvə toplantısında iştirak etmək üçün Ər-Riyada gedib. Rəisi sammitdəki çıxışında İslam ölkələrini İsrailə qarşı hərəkətə keçməyə çağırıb.
Nuranə Məmmədova
