“İranda baş verən hadisələrin gedişini izlədikcə belə bir mənzərə alınır ki, sanki dövlət strukturları hadisələrin ilk günündən iflas edib və hakimiyyət boşluğu yaranıb. Xalq bir həftədir küçələrdə istədiyini edir, amma əvvələr belə iğtişaşlara göstərilən reaksiya indi yox səviyyəsindədir. Burdan belə bir məntiq hasil olur ki, kimlərsə gözləmə mövqeyindədir”.
Bu fikirləri Elchi.az-a açıqlamasında BAXCP sədrinin müşaviri, politoloq Azər Qasımov bildirib:
“İranda bu tip iğtişaşlara həmişə rast gəlinib. Amma hiss olunur ki, bu dəfə xalqı sərbəst buraxıblar, dövlət isə öz işindədir. Hərbi parad keçirir, Rəisi BMT-nin iclasına gedir, məclis Azərbaycan əleyhinə müzakirə aparır.
İranda baş verənlərin daxili çəkişmələrin nəticəsi hesab etmək olar. Xomeneinin yerinə iddia edən qüvvələrin gözləmə mövqeyi tutduğu hiss olunur. Tərəflər gözləyir ki, hadisələr daha da gərgin hal alsın, sonra hansı tərəf bu gərginliyi yatıra bilsə, hakimiyyəti də bu qrup ələ alsın.
Bir sıra dəyişikliklərin olması gözləniləndir. Xalqın istəklərinin müəyyən hissəsi yerinə yetiriləcək. Azərbaycanlıların daha çox tələblər etməsi vacibdir, çünki ən çox onların haqları İranda pozulub.
Hadisələrin əsas məqsədi isə hesab edirəm ki, daxildəki əlaltıları vasitəsi ilə İranın Amerika ilə gözlənən nüvə anlaşmasına zəmin hazırlanması dayanır. İranın nisbətən demokratikləşməsi görüntüsü yaratmaq və hakimiyyət daxilində konservativ qüvvələrin müqavimətini qırmaq məqsədi güdülür ki, islahatçı qüvvələrin yolu açılsın. İğtişaşlar da buna hesablanıb.
SEPAH-ın bu hadisələrdə Azərbaycan, Türkiyə və İsrailin əlinin olması faktını qabartması çox təhlükəli tendensiyanın əsasının qoyulduğunu göstərir. Hesab edirəm ki, bu, SEPAH yönlü qüvvələrin hakimiyyəti ələ alacağından xəbər verir. Ordu ilə SEPAH-ın bir-biri ilə bəzi yerlərdə qarşı-qarşıya gəldiyi xəbərləri də gəlirdi. Bu durumda İranın yeni hakimiyyətinin özünə kimləri hədəf seçəcəyinin əsası qoyulur”.
Yeganə
