“Coğrafi baxımdan uzaq olsalar da, ideoloji baxımdan yaxındırlar”; Bayraqları da oxşardı
“Agence France-Presse” Nigeriyada fəaliyyət göstərən “Boko Haram” terrorçu qrupu ilə İŞİD arasındakı əlaqələrə diqqət çəkir. Bildirir ki, bu iki qrup coğrafi baxımdan uzaqda olsa da, onlar ideoloji baxımdan çox yaxındır.
İŞİD lideri Əbu Bəkir əl-Bağdadinin bəyan etdiyi xilafət indi yeni nəsil cihadçılar üçün “əl-Qaidə”dən daha cazibədardır. Bu cəzibə Afrikada da özünü aydın göstərir. Məsələn, “Boko Haram” İŞİD-in taktikasından istifadə edir, İŞİD sayağı bəyanatlar səsləndirir, İnternetdən İŞİD kimi təbliğat üçün yararlanır. Düzdür, bu iki terror qrupu arasında birbaşa əlaqə yoxdur. Ancaq müşahidələr göstərir ki, bu iki terror qrupu bir-birinə diqqət edir, bir-birindən öyrənir.
Agentlik mütəxəssislərə istindən bildirir ki, əvvəllər “Boko Haram” daha çox “əl-Qaidə” tərəfindən dəstəklənirdi. Ancaq son vaxtlar hər şey İŞİD-ə hesablanıb. İŞİD lideri Əbu Bəkir əl-Bağdadi və “Boko Haram” lideri Əbubəkir Şekau bir-birilərinə qarşılıqlı simpatiya sərgiləyirlər. Xilafət elan olunduqdan 1 ay sonra Əbubəkir Şekau İslam Dövlətinə dəstək verdiklərini bəyan etdi.
“Boko Haram” Nigeriyada Çibok deyilən yerdə 276 nəfər azyaşlı qızı əsir götürdü. Sonra İŞİD yezidi kürdlərin qızlarını ələ keçirdi. Hər iki tərəfin səsləndirdiyi bəyanatlarda bir-biri ilə səsləşən xeyli nöqtələr vardı. Bu məsələdə İŞİD “Boko Haram”dan yararlandı…
“Boko Haram” Nigeriyada 20-40 min kv.km əraziyə nəzarət edir. 10 yerli hökumət onların əlindədir. Onlar kifayət qədər güclüdürlər. İş o yerə çatıb ki, onlar ağır silahlardan istifadə edirlər, tanklar vasitəsi ilə hərbi parad təşkil edirlər. Həmin tanklar Nigeriya ordusundan qənimət olaraq ələ keçirilib. Maraqldır ki, “Boko Haram”ın bayrağı da İŞİD-in bayrağını xatırladır.
“Boko Haram” Yobe şəhərində yerli şiələrə qarşı qəddar hücumlar təşkil edir, İŞİD də Yaxın Şərqdə məzhə savaşını körükləməklə özünə tərəfdarlar toplayır. (musavat.com)
