“İslam dinində namaz qılmaq fərz, yəni vacib qəbul olunur. Peyğəmbər salavatullahın hədislərində namaz dinin dirəyi sayılıb. Gündə beş vaxt namaz bütün məzhəblərə görə fərzdir. Müəyyən üzrlü səbəbdən namazını ötütmüş müsəlman da sonra münasib şərait yarandıqda qılmadığı namazlarını qəzasını qılmalıdır” – bu sözləri Elchi.az-a müsahibəsində Milli Cəbhə Partiyasının sədr müavini, ilahiyyatçı Tural İrfan deyib.
O, həmçinin əlavə edib:”Şərait əl verdiyi halda namazı biryolluq tərk etmək böyük günahlardan sayılır. Ancaq müstəhəb namazlar var ki, onları qılıb qılmamaqda müsəlman ixtiyar sahibidir. Qılsa savab qazanar, qılmazsa günah qazanmaz. Ancaq namaz qılmayan dindən çıxmaz, kafir sayılmaz. Sadəcə öz dininə riayət etməyən müsəlman hesab olunar. Bu da insanı müsəlmanlıqdan xaric etməz. Bəzi şəxslər namaz qılmayanları təkfir edirlər, onları dinsiz adlandırırlar. Bu qətiyyən doğru deyil. Namaz qılmazdan əvvəl müsəlman, müsəlman olmazdan əvvəl insan olmaq lazımdır. Çünki İmam Hüseynin başını kəsənlər də namaz qılanlar idi. Namaz qılmayan o qədər xeyirxah, dürüst insan var ki…
İlahiyyatçı eyni zamanda namazın insanı mənfi işlərdən uzaqlaşdırdığını da vurğulayıb:” Peyğəmbər salavatullah buyurur ki, namaz o zaman qəbul olur ki, o namaz insanı pis əməllərdən çəkindirir. Lakin biz dövrümüzdə çoxsaylı namaz qılanlar görürük ki, onlar pis işlər ilə məşğul olurlar, qiybət edirlər, ara vururlar, məzhəb ixtilafı salırlar, dini siyasətə qatırlar… Bax, bu cür namaz qılanların namazı qəbul ola bilməz.
Quranda Maun surəsində Allah təala buyurur ki, “vay halına namaz qılanların. O namaz qılanların ki, namazlarının mahiyyətindən bixəbərdirlər.”
Namaz möminin meracı, yəni Allahla görüşüdür. Həzrət Məhəmməd peyğəmbər belə buyurur. İnsan öz xaliqi ilə rabitədə olur, ona dua edir, ondan yardım istəyir və saflaşır, gündə beş dəfə Rəbbi ilə əhdini təzələyir. Əsl namaz budur. Namazda əsas olan insanın mənən Allaha bağlılığı, ixlasıdır”.
Havar Şəfiyeva
