“İsmayıllıya yağan güclü leysan və dolu rayonun elektrik, qaz, yol və digər kommunal təsərrüfatlarına, eləcə də kənd təsərrüfatına ciddi ziyan vurub”.
Bunu İsmayıllı rayon İcra Hakimiyyətinin İnformasiya təminatı və təhlil sektorunun müdiri Rəvan İsgəndərli bildirib.
İcra rəsmisi qeyd edib ki, Oğuz-Qəbələ-Bakı su kəmərinin rayonun Kürdmaşı kəndi ərazisindən keçən hissəsi sel suları nəticəsində yuyulmaya məruz qalıb.
“Eyni zamanda İstisu kəndində su kanalına yıxılaraq sel aparalan, lakin xilas edilən 2004-cü il təvəllüdlü Sadıqova Sabinə Samir qızı İsmayıllı Rayon Mərkəzi Xəstəxanasının reanimasiya şöbəsinə yerləşdirilib, Hazırda onun vəziyyəti yaxşıdır.
Güclü leysan və dolu rayon ciddi ziyan vurub. Qaraməryam-İsmayıllı-Şəki avtomobil yolunun 8-ci kilometrliyindən 23-cü kilometrliyinə qədər olan hissəsində körpülər, suötürücülər və yol təsrrüfatına aid olan bütün qurğular sel sularının gətirdiyi daş-çınqıl, ağac kötükləri və torpaq lilləri nəticəsində yararsız vəziyyətə düşüb”.
Sektor müdirinin sözlərinə görə, Enişdibi kəndində 35 kilovoltluq elektrik xəttində metal anker-dayağın aşması nəticəsində 15 kəndə elektrik enerjisinin verilişi kəsilib.
“Talış qazpaylayıcı stansiyasından 11 kəndi qazla təchiz edən daşıyıcı kəmərin qırılması nəticəsində kəndlərə qaz verilişi dayandırılıb. Qarakolluq kəndində 4, Kürdmaşı kəndində 3 körpü və kəndiçi yollar dağılıb. Əhən kəndinə gedən yolu sel suları dağıdıb.
Buynuz, Kəlbənd, Kürdmaşı, Aşıqbayramlı, Quşencə, Balik, Talış, Enişdibi, Hapıtlı, Qarakolluq və Təzəkənd kənlərində yağan güclü leysan və dolu nəticəsində fərdi təsərrüfatlara və əkin sahələrinə ciddi zərər dəyib, sel suları nəticəsində mal-qara tələf olub. Quşencə, Zoğallıq, Kürdmaşı, Topçu və Buynuz kəndlərində həyətlərə və evlərə sel suları dolub”.
R.İsgəndərli bildirib ki, İsmayıllı rayon Fövqəladə Hallar Komissiyası tərəfindən rayona dəymiş ziyan dəqiqləşdirilir: “Rayon İcra Hakimiyyətinin başçısı Mirdaməd Sadıqov, Meliorasiya və Su Təsərrüfatı Açıq Səhmdar Cəmiyyətinin sədr müavini Zakir Quliyev hazırda əraziyə baxış keçirirlər”.
