Ötən gün Tasnim Agentliyinə istinadən məlumat yayıldı ki, İsrail İranın Suriyada yerləşən və PUA istehsal edən zavodunu dəqiq raket atəşilə məhv edib. Ümimiyyətlə Suriyada müharibə başlayandan günümüzəcən tez-tez xarici mətbuatda İsrailin İran hərbi bazalarına endirdiyi zərbələrlə bağlı xəbərlər gedir. Görəsən bu statistikanı aparan hansısa hərbi dərgi, və ya ekspert varmı? Bu hücumlarla İsrail nəyə nail ola bilir?
Bu mövzuda Yaxın Şərq mətbuatı üzərindən açıqlamalar və hesabatlar hazırlayan analitik Cəmaleddin Quliyev özünü sosial şəbəkə üzərindəki hesabinda bildiri ki, İsrail Suriyada İran hərbi obyektlərini, İran öz vətəndaşlarını “ovlayır”.
Elchi.az analitikin fikirlərini olduğu kimi dərc edir. “Təl-Əvivin yüksək səviyyəli müdafiə rəsmiləri bildiriblər ki, İsrail ordusu Suriyada “Hizbullah”la birlikdə möhkəmlənməyə çalışan İranın hərbi infrastrukturunun təxminən 90%-ni məhv edib .
Onların iddiasına görə, İsrail son illərdə İranın Suriyaya silah ötürmək, ölkə ərazisində silah istehsal etmək və orada iranpərəst qüvvələrlə baza yaratmaq imkanlarını demək olar ki, tamamilə məhdudlaşdırmağa nail olub. Hücumlar nəticəsində Suriya ordusunun silah və sursat istehsal etmək qabiliyyəti də zərər görüb, çünki iranlılar və “Hizbullah” silah istehsal etmək üçün eyni zavodlardan istifadə edirmişlər.
Bununla yanaşı, İsrail mənbələri hesab edir ki, Suriya prezidenti Bəşər Əsəd ölkəsində İran və “Hizbullah”ın fəallığını azaldıb, çünki onların Suriyada mövcudluğunu faydalı hesab etmir.
İranın bu əməliyyata cavabı özünəməxsusdur-yenidən öz vətəndaşlarına qarşı “casus ovu” əməliyyatlarına start verilib. İran hakimiyyət orqanları Qərbi Azərbaycan vilayətində “düşmən sionist qurumu ilə əlaqəli on agenti” həbs etdiyini xəbər verir. Tasnim Agentliyinin məlumatına görə, bu qrupun üzvləri “Mossad” zabitləri ilə birbaşa videobağlantı vasitəsilə əlaqə saxlayırlarmış. Bu qruplaşma üzvləri Qərbi Azərbaycan, Tehran və Hormozqan vilayətlərində İranın xüsusi xidmət orqanları ilə əlaqəsi olan bəzi şəxslərin avtomobillərini və evlərini yandırdıqdan sonra fotoşəkillərini çəkib “Mossad” rəsmilərinə göndərmək müqabilində nağd pul alıblar. Bu, 2020-ci iin noyabrından üzü bəri “Mossad” “agentlərinin” elan edilmiş 5-ci “kütvəli ifşası”dır.
Son iğtişaşlar zamanı İran rəsmilərinin, güc qurumları nümayəndələrinin kütlə tərəfindən fitlə qarşılanması, bəzən onların linç edilməsi, tədbirlərdən qovulması kütləvi hal alıb və bu anları əks etdirən videogörüntülər, adətən, sosial şəbəkələrdə yayılır, bəzən beynəlxalq KİV-lərin də xəbər lentlərində nümayiş olunur. Amma göründüyü kimi, iğtişaşları videoya çəkib yayan istənilən İran vətəndaşı kəşfiyyat qurumlarının nəzərində potensial “Mossad agenti”dir. Yəni “casus ovu” hələ çox davam edəcək, həbs olunanlardan qonşu dövlətlərə qarşı ifadələr də alınacaq.”
Şəlalə
