İsrail və HƏMAS arasında münaqişədə humanitar fasilənin üçüncü günündə İsrail həbsxanalarında olan 39 fələstinli uşaq əsir azad edilib. Həmas həmçinin 14 İsrail və 3 əcnəbi vətəndaşı Qırmızı Xaç təşkilatına təhvil verib.
Elchi.az xəbər verir ki, HƏMAS və İsrail arasında əldə olunan razılaşma çərçivəsində İsrail həbsxanalarında saxlanılan 39 fələstinli uşaq sərbəst buraxılıb.
İşğal altındakı İordan çayının qərb sahilində yaşayan azad edilmiş uşaq əsirlər Beynəlxalq Qırmızı Xaç Təşkilatına məxsus avtobusla İsrailin Ofer Hərbi Həbsxanasını tərk edərək Ramallaha doğru hərəkət ediblər.
Şərqi Qüdsdə yaşayan uşaqlar ailələrinə təhvil verilmək üçün İsrail polisinin müşayiəti ilə həbsxanadan çıxıblar.
Fələstin Məhbuslar Dərnəyi və Fələstin Azadlıq Təşkilatına (FAT) bağlı Məhbuslar və Azad Edilən Nümayəndə heyəti, İsrail və HƏMAS arasında əsir mübadiləsi razılaşması çərçivəsində azad edilməsi gözlənilən üçüncü qrup məhbus fələstinlinin adlarını açıqlayıb.
Qurumdan edilən yazılı açıqlamada siyahıdakı 39 nəfərin hamısının uşaq olduğu və onlardan 21-nin Qüdsdən, 1-nin Qəzza zolağının Rəfah şəhərindən, qalanlarının isə Qərbdəki şəhərlərdən olduğu bildirilib.
HƏMAS və İsrail arasında əldə olunan razılaşma çərçivəsində Qəzza zolağından 39 israilli qadın və uşaq məhbus, İsrail həbsxanalarından isə 117 fələstinli qadın və uşaq məhbus azad edilib.
Nuranə Məmmədova
