Keçmiş baş prokuror Kəlbəcərli girovlarla bağlı prokurorluğa səsləndi

Tanınmış vəkil Bəhruz Bayramov ötən gün Moderator.az-a açıqlamasında Kəlbəcərdə girov götürülən Şahbaz Quliyev və Dilqəm Əsgərov, eyni zamanda qətlə yetirilən Həsən Həsənovla bağlı Baş Prokurorluğun bu günədək Azərbaycan Respublikası Cinayət Məcəlləsinin müvafiq maddələriylə cinayət işi qaldırmamasına etirazını bildirib.

B. Bayramovun açıqlaması burada—-moderator.az/?xeber=57719

Keçmiş baş prokuror İxtiyar Şirin də prokurorluğun bu mövqeyinin anlaşılmaz olduğu qənaətindədir:

“Bu hadisələr, yəni girov götürmələr, qəsdən adam öldürmə, işgəncə vermə cinayətləri Dağlıq Qarabağda baş verdiyinə, həm də Azərbaycanlılara qarşı törədildiyinə görə Baş Prokurorluq bu faktlara görə mütləq cinayət işi başlamalı, bunu törədən erməni terroristlərinin, o cümlədən tanınmamış Dağlıq Qarabağ Respublikasının və Ermənistan Respublikasının bu işə rəhbərlik edən vəzifəli şəxslərinin cinayət məsuliyyətinə cəlb edilməsi, onların haqqında həbs qətimkan tədbiri seçilməsi, İnterpola axtarışa verilməsi barədə qərarlar qəbul etməli idi. Əgər bunlar edilməyibsə, deməli prokurorluq öz vəzifələrini yerinə yetirməyib. Mən anlaya bilmirəm ki, prokurorluq niyə bu məsələdə belə mövqe tutdu. Ancaq düşünürəm ki, hələ də gec deyil və prokurorluq yubanmadan cinayət işi qaldırmalıdır.”