“Rusiyada Kremlin havasına oynamayan sənətçilər gözümçıxdıya salınır”.
Bunu Rusiya Mədəniyyət Nazirliyinin rəsmisi Yevgeny Savostyanov deyib. O, bunu əsas gətirərək vəzifəsindən istefa verib.
Nazirlikdə Əqli Mülkiyyət üzrə Koordinasiya Şurasının rəhbəri olmuş Savostyanov deyir ki, hakimiyyət “sözə baxmayan sənətçilərin təcrid edilməsi” yolunu tutub.
O, nazir Vladimir Medinskiyə ünvanladığı məktubda bu cür siyasətə görə xəcalət çəkdiyini yazıb.
“Azadlıq” radiosunun rus xidmətinə müsahibə verən Savostyanov bildirib ki, rus rejissoru Andrei Zvyagintsevin builki “Oskar” mükafatına namizəd olan “Leviafan” filminin Rusiyada göstərilməsinə qadağa qoyulması üçün edilən çağırışlar utancvericidir.
Belə bir məqamda Mədəniyyət Nazirliyi susur. Halbuki ucadan deməlidir ki, “fərqli fikrinə görə heç bir sənətçiyə qadağa qoyulmamlıdır”.
Qeyd edək ki, “Leviafan” Rusiyada kök salan korrupsiya probleminə işıq tutur.
Savostyanovun sözlərinə görə, nazir fərqli düşünən rejissorlara məhdudiyyət qoyulmasına şəxsən göstəriş verir. Məsələn, onlara filmlərini festivallara göndərmək üçün maliyyə ayırmır.
“Axı niyə belə olmalıdır? Biz hamımız vergi veririk. Özü də ideoloji mövqeyimizdən asılı olmayaraq. Niyə kimlərsə çıxdaş edilməlidir, kimlərəsə şərait yaradılmalıdır?!” – deyə o soruşur.
Savostyanov təəssüflə deyir ki, nazirin iş prinsipləri sovet dövrünün sənətə kommunist yanaşmasını xatırladır: “1987-ci ildən bəri, yəni Qorbaçovun yenidənqurmasından bu yana sənət adamlarına qarşı bu qədər məhdudiyyət olmayıb. Və bu, sənətçilərdə özünüsenzura yaradır. Biz Yuri Andropovun ölümündən əvvəlki durğunluq dövrünə qayıdırıq”.
Son dövrlərdə Rusiyanın Ukraynaya təcavüzünü pisləyən bir sıra məşhur sənətçilər təzyiqlərə məruz qalıblar. Onların konsertləri ləğv edilib.
