İngiltərədə zəhərlənərək öldürülən sabiq kəşfiyyat zabiti Aleksandr Litvinenkonun işi üzrə keçirilən məhkəmədə London polisinin təmsilçisi cinayətdə Rusiyanın əli olduğunu bildirib.
Qeyd edək ki, 2006-ci ildə qaldığı oteldə polonium-210 maddəsiylə zəhərlənən Litvinenkonun ölümü ilə bağlı məhkəmə prosesi hazırda Londonda aparılır.
London şəhər polisinin vəkili Riçard Horvell bu iddia ilə məhkəmədə çıxış edərək deyib: “Litvinenkonun qətlini planlayanların onu öldürmək istədiyi ortaya çıxdı. Dəlillər bunu göstərir. Rusiya dövləti hansısa vasitə ilə Litvinenko cinayətinə qarışıb”.
İstintaq müəyyən edib ki, hazırda Rusiya parlamentinin üzvü olan sabiq kəşfiyyat işçiləri Andrey Luqovoy və Dmitri Kovtun Litvinenkonun çayına zəhər qarışdırıb. Həmin şəxslərin hadisədən qısa müddət əvvəl Litvinenkonun qaldığı otelə gəldikləri və onunla görüşdükləri müəyyən edilib.
Kremlin əleyhinə çıxışları ilə gündəmə gələn Litvinenko Rusiya DTK-sından istefa verdikdən sonra 2000-ci ildə İngiltərəyə gedib və orada prezident Putinlə bağlı ifşaedici faktlar açıqlayıb. Sabiq kəşfiyyatçı 43 yaşında ikən 2006-ci ilin noyabr ayında Londonda zəhərlənərək öldürülüb.
