Azərbaycan qaz istehsal edən ölkə olsa da həmişə vətəndaşlar qaz verilişindən narazılıq edib. Yəni, dünyaya qaz satan ölkənin vətəndaşı qazsızlıqdan əziyyət çəkib. Xüsusən də qış aylarında tez-tez qazlar kəsilir, vətəndaşlar çətinliklə üz-üzə qalır. Həm də SOCAR rəhbərliyi etiraf edir ki, Azərbaycan Gürcüstandakı erməni kilsələrinə pulsuz qaz verir. Bu etiraf ölkə vətəndaşı üçün daha təhqiredici xəbər oldu. Necə olur ki, öz vətəndaşın pul ödədiyi halda normal qazla təmin olunmur, amma erməni kilsələrinə pulsuz qaz verilir?
Bütün bunları ona görə xatırlatdıq ki, redaksiyamıza tez-tez bu mövzuda şikayətlər daxil olur. Bu gün isə bir qrup məcburi köçkün redaksiyamıza müraciət edib və problemləri həll olunmayacağı təqdirdə Binəqədi şossesini bağalayacaqlarını bildirirlər.
Müraciətdə deyilir ki, Binəqədi şossesi döngə 1 və döngə 2-də məskunlşamış məcburi köçkünlər noyabr ayının 5-dən bu günə qədər mavi yanacaq üzünə həsrət qalıblar. Onlar dəfələrlə aidiyyatı orqanlara müraciət etsələr də müxtəlif bəhanələrlə üzləşiblər. Hətta onlara bildiriblər ki, yuxarıların göstərişinə əsasən qənaət rejiminə keçiblər.
Müraciətdə o da qeyd olunur ki, məcburi köçkünlərin qazı qəsdən kəsilib və Masazırdakı istixanalara yönəldilib.
Məcburi köçkünlər bildirir ki, əgər onların problemi həll olunmasa, müraciətləri eşidilməsə Binəqədi şosesini bağlayıb etiraz aksiyası keçirəcəklər.
