Mənzil bazarı ilə bağlı proqnoz verərkən bu sahədə fəaliyyət göstərən sahibkarları düşünmək lazımdır.

Axar.az xəbər verir ki, bunu əmlak bazarı üzrə ekspert Ramil Osmanlı deyib. O bildirib ki, 2016-cı ilin mənzil bazarındakı durumla bağlı proqnoz verməyin mənfi və müsbət nəticələri ola bilər:

“Ümumiyyətlə, proqnoz verərkən bir qədər diqqətli olmaq lazımdır. Çünki bizim qiymət azalması baxımından verdiyimiz hər bir açıqlama onlarla, yüzlərlə alıcının bazardan çıxıb gözləmə mövqeyinə keçməsi ilə nəticələnə bilər. Eyni zamanda potensial alıcılar var ki, bazarda onların da hər hansı əməliyyatlarının qarşısını ala bilərik. Düşünürəm ki, qarşıdakı il üçün proqnoz vermək bir qədər mənfi tendensiyalara gətirib çıxara, bazarda passivliyi artıra bilər”.

Prezidentin ipoteka fərmanına münasibət bildirən ekspert qeyd edib ki, bu istiqamətdə aparılan müzakirələr müsbət sonluqla bitəcək:

“İllərdir ki, biz Mərkəzi Bankın və İpoteka Fondunun rəhbərliyi timsalında ipoteka proqramı istiqamətində islahatların aparılacağı, faizlərin aşağı salınacağı, kreditlərin məbləğinin artırılması ilə bağlı məlumatları eşidirik. Lakin çox təəssüflər ki, bununla bağlı qərar qəbul olunmur. Düşünürəm ki, prezidentin bu məsələyə müdaxiləsindən sonra həmin müzakirələrin müsbət sonluqla bitməsinə zəmin yaranır. Bu, kreditlərin faiz dərəcələrinin aşağı salınmasında, kredit məbləğinin artırılmasında, əmək haqqı və ilkin ödənişlərlə bağlı tələblərin sadələşdirilməsində özünü göstərəcək. Bundan başqa, fərmanın ən aktual və vacib tərəflərindən biri də sosial qayğıya ehtiyacı olan əhali qruplarının mənzil təminatının yaxşılaşdırılması məsələsidir ki, bu ipotekanın mahiyyətini bir qədər dəyişəcək. Amma bütün hallarda cənab prezidentin birbaşa fərmanı ilə İpoteka Fondu Açıq Səhmdar Cəmiyyətinin yaradılması idarəetmənin təkmilləşdirilməsi və bu istiqamətdə fəaliyyətinin aktivləşdirilməsindən ibarət olacaq”.