Ədalət Əliyev: “Hadisələrdə kənar müdaxilənin olduğunu düşünmürəm”; Firudin Qurbansoy: “Bir neçə ildən sonra o 
təyyarələr üzə çıxacaq”
Dekabrın 28-də səhər saatlarında Malayziyaya məxsus təyyarənin yoxa çıxması barədə xəbərlər yayıldı. İçərisində 162 insanın olduğu “Air Asia” şirkətinin təyyarəsi İndoneziyanın Surabaya şəhərindən Sinqapura uçarkən radarlardan itib.
Günorta saatlarında isə Malayziya təyyarəsinin tapıldığı barədə xəbərlər yayıldı. Yayılan xəbərdə göstərilirdi ki, radarlardan itmiş mülki sərnişin təyyarəsi hava burulğanlığına düşüb və kursu dəyişdirməyə cəhd edərkən Belitunq adasının yaxınlığında suya düşüb.
Qeyd edək ki, bu ilin martında da buna bənzər hadisə yaşanmışdı.
Martın 8-də Malayziyaya məxsus təyyarə paytaxtın Kuala-Lumpur şəhərindəki beynəlxalq limanından səmaya qalxaraq MH370 reysi ilə Pekinə uçub. Fəqət uçuşun 2-ci saatında təyyarə radarlardan itib. Yoxa çıxmış təyyarədə 227 sərnişin və 12 nəfər heyət üzvü vardı. İndiyə qədər keçən müddət ərzində hələ də itən təyyarədən xəbər yoxdur.
Bundan əlavə, yayda Donbasda, Ukrayna səması üzərində başqa bir Malayziya sərnişin təyyarəsi vurulmuş, nəticədə 300-yə yaxın insan həlak olmuşdu.
Maraqlıdır ki, bu il baş verən müəmmalı təyyarə qəzalarında yalnız Malayziyanın adı hallanır. Çoxları bu hadisənin qəsdən törədildiyini iddia edirlər. Təsadüfi olduğunu düşünənlər də az deyil. Proseslərin kökündə mistikanın dayandığını ehtimal edənlər də mövcuddur.
“AZAL”-ın sabiq prezidenti Ədalət Əliyev baş verən hadisələrin yalnız təyyarənin nasazlığı ucbatından baş verə biləcəyini bildirdi: “Mən heç bir kənar müdaxilənin olduğunu düşünmürəm. Təyyarənin nasazlığı ucbatından baş verə bilər. Heyətin səhvinin olduğu ehtimalı da var. Biri okeana düşüb tapılmır. Bu gün ki isə hansısa səbəb ucbatından baş verib. Yəqin ki, tam təfsilatı ilə məlum olacaq. Başqa kənar müdaxilə olduğuna inanmıram. Ukraynada kənardan müdaxilə olmuşdu. Ruslar vurmuşdular. Təyyarənin gövdəsi görünürsə, ola bilsin ki heyətin səhvindən, yaxud nasazlıqdan baş versin. Hansı əraziyə düşübsə, orada vura da bilərlər”.
Tanınmış astroloq Firudin Qurbansoy bu hadisədə mistikanın olmadığını söylədi: “Keçən əsrin ortalarında xüsusi bir sistem qurulmuşdu. O sistemlə indiki sistem mövcud fizika qayda-qanunlarına tabe deyil. Sadəcə, bədbəxt ölkə kimi Malayziya ortaya çıxıb. Təyyarələrinin başına bu cür oyunlar gətirilir. Başqa ölkələr olsa, səs-küy çıxardı. Burada qeyri-adi heç nə yoxdur. Bir neçə ildən sonra o təyyarələr üzə çıxacaq”.
Cavanşir ABBASLI
