Bəşəriyyətin Marsı müstəmləkə etmək arzusu uzun illərdir mövcuddur. Bunun üçün artıq müxtəlif tarixlər qeyd olunmağa başlayıb. 2033-ü hədəfləyənlər də var, 2050 və ya 2070-i göstərənlər də. Lakin bəzi ekspertlər bunun yaxın gələcəkdə mümkün olmayacağını deyirlər.
Alimlər Marsda daimi məskunlaşmaq və orada bazalar qurmaq üçün işlərini davam etdirirlər. Qırmızı planetdə həyatın yaranma tarixləri artıq qeyd olunmağa başlayıb. ABŞ-ın “Space X” kosmik nəqliyyat şirkətinin sahibi, məşhur milyarder İlon Mask keçmişdə 2050-ci ilə qədər Marsda bir milyon nəfərlik koloniya yaratmaq planının olduğunu açıqlamışdı.
İngiltərədəki Vestminster Universitetinin professoru Lewis Dartnell, Marsda həyat üçün 2070 və ya 2130-a işarə edərək, daha təvazökar bir təxmin etdi. Dartnell həmçinin deyir ki, Marsda qurulacaq ilk koloniyada Elon Maskın iddiasının əksinə olaraq az sayda insan yerləşəcək. Birləşmiş Ərəb Əmirlikləri 2117-ci ildə Marsda 600 min nəfərlik şəhər qurmağı planlaşdırır. Qırmızı planetə ilk insan uçuşunu 2033-cü ildə etməyi planlaşdıran Çin, bu tarixdən etibarən Marsda baza qurmağa başlayacağını açıqlayıb.
İndiyə qədər bir çox insansız kosmik gəminin göndərildiyi bu səma cisminə insanların heç vaxt ayaq basmadığını nəzərə alan elm adamları bu tarixlərin real olub-olmaması mövzusunda fikir ayrılığına düşürlər. Bəzi elm adamları yaxın gələcəkdə Marsın koloniyalaşdırılmasının mümkün olduğunu, bəziləri isə aradan qaldırılmalı çoxlu problemlərin olduğunu bildirir.
Nuranə Məmmədova
