“9 May qələbə günündən sonra Dağlıq Qarabağ münaqişəsinin həlli ilə bağlı Ermənistan və Azərbaycan arasında danışıqlar prosesi aktivləşəcək”.

Bu barədə  millət vəkili, politoloq Elman Nəsirov bildirib.

Millət vəkili qeyd edib ki, 9 May-dan sonra Ermənistana danışıqlara getməklə bağlı təzyiqlər artacaq: “Rusiya hazırda münaqişənin həlli ilə bağlı fəallığı ilə seçilir. Rusiya 9 May faşizm üzərində qələbə günü ilə əlaqədar tədbirə hazırlaşır. Yəni dövlət siyasəti daha çox bu istiqamətə yönəlib. İstisna deyil ki, 9 Maydan sonrakı iki həftə ərzində Ermənistan rəhbərliyi danışıqlardan yayınmağı maksimum uzada bilsin. Bunun ardınca Ermənistanın danışıqlara getməkdən başqa çarəsi qalmayacaq.

Təsadüfi deyil ki, Ermənistanın xarici işlər naziri Edvard Nalbandyan bununla bağlı mövqe bildirib. Sarkisyandan fərqli olaraq Nalbandyan şərtlərsiz danışıqlara hazır olduqlarını deyib. Bu, onun nəticəsidir ki, Ermənistana çox ciddi təzyiqlər var və danışıqlara getməsi zaman məsələdir”, – deyə E.Nəsirov vurğulayıb.