Bu gün Nizami Kino Mərkəzində Milli Kino Gününə həsr olunmuş tədbir keçirilib.
APA-nın məlumatına görə, kino sahəsində görülən işlərdən bəhs edən qısametrajlı filmin nümayişindən sonra çıxış edən mədəniyyət və turizm nazirin müavini Ədalət Vəliyev bildirib ki, Azərbaycan son illər digər sahələrdə olduğu kimi, mədəniyyət sahələrində də böyük uğurlara imza atır.
Onun sözlərinə görə, ölkənin kino sənayesi yenidən qurulub: “Kino da ölkəmizin inkişaf edən sahələrindəndir. Biz bəzən narazı qalırıq ki, yaxşı kinolarımız niyə azdır? Amma əslində bu işlə məşğul olan adamlara hər şey aydındır. Çünki Azərbaycan kinosu son illər daha da inkişaf edib. Bu gün Azərbaycan kinolarının səs-sorağı beynəlxalq festivallardan gəlir. Kino sənayesi yenidən qurulub, filmlərimiz Azərbaycana baş ucalığı gətirən mükafatlara layiq görülür. Filmlərimizin bir neçə xarici dillərdə tamaşaçılara təqdim olunması, özəl kinoteatrların artması kinoya olan maraqdan irəli gəlir. Bu gün kino sənayesi ilə məşğul olan gənc kadrlar da meydana gəlib. Bu baxımdan biz kinomuzun daha da inkişaf etdiyini əminliklə deyə bilərik”.
Sonra kino sahəsindəki fəaliyyətlərinə görə, 4 nəfərə Fəxri Mədəniyyət İşçisi döş nişanı təqdim edilib, mədəniyyət və turizm naziri Əbülfəs Qarayevin əmri ilə kinostudiyanın işçiləri mükafatlandırılıb.
Kinematoqrafçılar İttifaqının sədri, xalq artisti Şəfiqə Məmmədova çıxışı zamanı kino işçilərinin peşə bayramını təbrik edərək, ittifaqın bir neçə kino işçisini pul mükafatı ilə təltif etdiyini bildirib.
Sonra C. Cabbarlı adına “Azərbaycanfilm” kinostudiyasında lentə alınan “4.1 Şəhər motivləri” adlı kinoalmanax təqdim edilib. Kinoalmanax xarici ölkələrdə yaşayıb təhsil alan azərbaycanlı rejissorların çəkdikləri 5 qısametrajlı filmdən ibarətdir. Azərbaycan Prodüserlər Gildiyasının elan etdiyi “Geniş baxış” ssenari müsabiqəsinin qalibi olan kinolayihə əvvəlcə “Motivlər…” adı ilə lentə alınıb.
“4.1 şəhər motivləri” almanaxına “Qonşu qadın” (rejissor Anar Abbasov, operator Aleksey Şepilev), “20-ci mərtəbə” (rejissor Teymur İsmayılov, operator Nadir Mehdiyev), “Dmitrov küçəsi ev, 86” (rejissor Cəfər Axundzadə, operator Əlişir Hamid Xocayev), “Kədərim” (rejissor Rüfət Həsənov, operator Mixail Benkin) və “Zabitin şərəfi” (rejissor Vüqar İslamzadə, operator Cabir Əliyev) qısametrajlı filmləri daxildir. Almanaxın redaktoru Yusif Şeyxov, prodüserləri Müşfiq Hətəmov və İradə Bağırzadədir. Layihənin quruluşçu rəssamı Rafiq Nəsirov, icraçı prodüseri isə Azər Quliyevdir.
