Rusiya polisi Moskva ətrafındakı Lobne qəsəbəsində mağazadan kassa aparatını və satıcı qadının qızıl boyunbağısını zorla alıb qaçan 5 nəfərdən ibarət banda üzvlərinin 3-nü silah gücünə yaxalaya bilib. Polis onları atəş açmaqla zərərsizləşdirib.
Virtualaz.org saytı xəbər verir ki, Rusiya DİN mətbuat mərkəzindən “İnterfax”a verilən məlumata görə, yanvarın 9-da Bukinskoye şossesindəki mağazaya basqın edən 5 nəfərdən ibarət maskalı şəxs dükanı və satıcını qarət edəndən sonra “Mitsubishi” maekalı avtomobillə hadisə yerindən qaçmağa çalışıb.
Lakin şahidlər buna qədər polis çağırmağa macal tapıbmış. Bıçaq və tapançalarla silahlanmış banda üzvləri ilə polis arasında atışma olub. Maskalılardan biri polisə silah çəkib. Lakin polislər daha çevik tərpənərək atəş açıb və banda üzvlərini zərərsizləşdirə bilib.
Nəticədə üç nəfər tutulub, daha iki nəfər isə qaçıb. Tutulanların üçü də Azərbaycan vətəndaşlarıdır. Adları açıqlanmayan bu şəxslərin maşınından digər soyuq silahlar, habelə gürz, lom da çıxıb. İnsident zamanı yaralanan olmayıb.
