Sərəncam Azərbaycan iqtisadiyyatının inkişafı ilə bağlı yol xəritəsinin hazırlanmasına imkan verəcək.
Bu sözləri prezidentin ölkə iqtisadiyyatı üzrə strateji yol xəritəsi ilə bağlı sərəncamınıAxar.az-a şərh edən iqtisadçı alim Vüqar Bayramov deyib. Ekspert hesab edir ki, əsas məqsəd ölkədə iqtisadi diversifikasiya imkanlarını nəzərə alaraq qeyri-neft sektorunu inkişaf etdirməkdir:
“Yeni sərəncamın əhəmiyyəti olduqca böyükdür. Sərəncam çərçivəsində hazırlanacaq yol xəritəsi beynəlxalq modellərə uyğun olaraq tətbiq edilməli və digər ölkələrin təcrübəsini öyrənməlidir. Azərbaycanda iqtisadi diversifikasiya ilə bağlı müxtəlif modellər tətbiq edilə bilər. Prezidentin bu addımı ölkədə dayanıqlı iqtisadi inkişaf modelinin formalaşması istiqamətində mühüm başlanğıc hesab edilə bilər. Hazırda strateji yol xəritəsinin detallarından danışmaq bir qədər çətindir. Yeni yol xəritəsinin iqtisadi təsirlərini ancaq İşçi qrupunun hazırladığı sənəddən sonra qiymətləndirmək mümkün olacaq. Bütövlükdə bu addım ölkə iqtisadiyyatının diversifikasiya imkanlarının qiymətləndirilməsi baxımından mühüm tədbir və tədqiqatların genişləndirilməsini gündəmə gətirir. İndiki məqamda dayanıqlı iqtisadiyyatın qurulması birbaşa iqtisadiyyatın hansı səviyyədə diversifikasiya olunmasından asılıdır. Bir sözlə, özündə vacib yenilikləri ehtiva edən sərəncam iqtisadi inkişaf strategiyasının hazırlanmasında böyük rol oyana bilər”.
Qeyd edək ki, martın 16-da Prezident İlham Əliyev “Milli iqtisadiyyat və iqtisadiyyatın əsas sektorları üzrə strateji yol xəritəsinin başlıca istiqamətləri”nin təsdiqi və bundan irəli gələn məsələlər haqqındasərəncam imzalayıb. Sərəncam üzrə müvafiq inkişaf planlarının işlənilməsi məqsədi ilə yeni İşçi qrupu yaradılacaq.
