“Paris teraktından sonra müsəlman cəmiyyətinə qarşı məqsədyönlü provokasiyalar başlayacaq”.
Bu sözləri Axar.az-a açıqlamasında rusiyalı politoloq Qriqori Trofimçuk deyib.
O, müsəlmanlara qarşı provokasiyaların terror təşkilatları şəklində konkret nöqtələrə yönələcəyini söyləyib:
“Parisdəki jurnal redaksiyasının güllələnməsinin əsas nəticəsi o oldu ki, bir sıra şəxslər bütün dünyada kütləvi şəkildə müsəlman karikaturalarının yayımlanmasına çağırış etdilər. Bu tip karikatular dünən gecə bir sıra saytlarda peyda oldu. Hətta bunu indiyə qədər belə məsələlərə toxunmayan kifayət qədər ciddi mətbuat orqanları da yayımladı. Beləliklə, müsəlman cəmiyyətlərinə qarşı məqsədyönlü provokasiyaların başladığı qənaətinə gəlmək olar. Bunlar isə müxtəlif terror təşkilatları şəklində artıq dünyanın konkret nöqtələrinə yönələcək. 2001-ci ildən sonra dünya köklü şəkildə dəyişdi. Belə ki, Qərb müsəlmanlar və hətta müxtəlif müsəlman ölkələrinə qarşı xüsusi qlobal kampaniyalar aparmağa başladı. Bununla da sakit, dinc müsəlmanlar terrorçular və radikal vəhhabilərlə bir sıraya qoyuldu”.
Politoloq heç kimin Parisdəki terror aktının arxasında müsəlmanların dayanacağına inanmayacağını bildirib:
“Bu gün dünyada destabilizasiya güclənib. İŞİD kimi dünyanın istənilən nöqtəsinə müxtəlif vətəndaşlar atıla bilər ki, onlar da burada öz məqsəd və qurbanlarını seçirlər. “Çarli Hebdo” jurnalı məhz lazım olan atmosferin yaradılması üçün istifadə edilən siyasi vasitələrdən biri oldu. Xoşbəxtlikdən Parisdəki redaksiyaya hücum edənlər sırasında postsovet məkanından olan müsəlmanlar olmayıb. Hələlik bütün hər şey terrorizm brendi olan Yaxın Şərqin ayağına yazılır. Amma axır-əvvəl Cənubu və Şimali Qafqaz, eləcə də Mərkəzi Asiyadan terrorçuların zərbəyə məruz qalacağına heç bir zəmanət verilmir. Prinsipcə, hər şey buna doğru gedir. Onu da qeyd etmək lazımdır ki, yenə də dünyaya müsəlmanlar haqqında mənasız səs-küydən başqa heç nə təqdim edilməyib. Hətta istintaq konkret şübhəlilər tapsa belə, heç kim burada müsəlman izinin olduğuna inanmayacaq. Gələcəkdə İŞİD-ə bənzər strukturların xarici siyasətdə Azərbaycan kimi ölkələrə qarşı şantaj kimi istifadə olunacağını da istisna etmək olmaz”.
