Gülağa Aslanlı: “Yanlış məlumatdır”
Müsavat və AXCP arasında müttəfiqlik məsələsi yenidən gündəmə gəlib. Sosial şəbəkələr və mətbuatda yayılan xəbərlərdə bu ilin noyabrında keçiriləcək parlament seçkilərində birgə iştirakla əlaqədar hər iki partiya arasında gizli danışıqların aparıldığı qeyd olunur. Hətta yaxın günlərdə bununla bağlı mətbuata açıqlama veriləcəyi də bildirilir.
Səsləndirilən bu iddialarla bağlı Müsavat rəhbərliyinin mövqeyini öyrəndik. Partiyanın İcra Aparatının rəhbəri Gülağa Aslanlı səsləndirilən fikirlərlə bağlı bunları dedi: “Müsavat Divanında bu məsələ müzakirə olunub. Partiyanın Məclisində qəbul edilmiş bəyanata uyğun olaraq, Divanda da müzakirələr aparılıb.
Seçkilərdə iştirak, iştirakın formaları, birgə mübarizənin təşkili, qanunvericiliyin dəyişdirilməsi istiqamətində siyasi partiyalarla müzakirələrin aparılması məqsədəuyğun hesab olunub. Müsavat tərəfindən digər partiyalara, xüsusilə AXCP-yə əməkdaşlıq təklifi edilməyib. Bu yanlış məlumatdır”.
