Hazırda Naxçıvan Avtomobil Zavodunda 9 modeldə avtomobil istehsal olunur. Bu avtomobillərə muxtar respublika ilə yanaşı, ölkəmizin digər bölgələrində də tələbat artmaqdadır. Naxçıvan Muxtar Respublikası İqtisadiyyat və Sənaye Nazirliyinin mətbuat xidmətindən bildirilib ki, Azərbaycan Respublikası Əmək və Əhalinin Sosial Müdafiəsi Nazirliyinin xətti ilə sosial qayğıya ehtiyacı olan insanlara və veteranlara “NAZ-Lifan LF-320” model avtomobillərin verilməsi “NAZ-Lifan” brendinə olan marağın və etibarın daha bir göstəricisidir. 2011-ci ildən bu günədək bu məqsədlə 2397 ədəd avtomobil istehsal olunaraq təhvil verilib. Bu ilin sonuna kimi Əmək və Əhalinin Sosial Müdafiəsi Nazirliyi üçün daha 400 avtomobilin istehsalı nəzərdə tutulub.
Texniki göstəricilərinə və dizaynına görə seçilən bu avtomobillər daxili bazarda xüsusi yer tutmaqla bərabər, xarici bazarda da özünə müştəri tapıb. Artıq bu ildən başlayaraq “NAZ-Lifan LF-330”, “LF-720” və “X-60” modelləri Belarus Respublikasına ixrac olunur.
Qeyd edək ki, 2010-cu ildə 37 nəfərlə fəaliyyətə başlayan zavodda hazırda 65 mütəxəssis çalışır.
