UNESCO-nun 41-ci Baş konfransı çərçivəsində Azərbaycanın iki tarixi şəxsiyyəti – mesenat Hacı Zeynalabdin Tağıyevin anadan olmasın 200 illiyi və bəstəkar Fikrət Əmirovun 100 illiyi UNESCO-nun 2022-2023-cü illər üzrə yubileylər proqramına salınıb və bu yubileylərin UNESCO səviyyəsində beynəlxalq miqyasda qeyd edilməsi təsdiq edilib.
Yəni UNESCO Tağıyevin yaşını 1823-cü ildən hesablayır. Lakin Tağıyevin məzarında doğum tarixi kimi 1838-ci il qeyd olunub. Eyni zamanda, ötən ay metronun İçərişəhər stansiyasının qarşısında ucaldılan Tağıyevin heykəlinin məlumat lövhəsində də doğum tarixi olaraq 1838-ci il yazılıb. Tağıyevin doğum tarixi ilə bağlı ziddiyyətə aydınlıq gətirmək üçün Mədəniyyət Nazirliyinə sorğu ünvanladıq.
Nazirlikdən APA-nın sorğusuna cavab olaraq bildirildi ki, Hacı Zeynalabdin Tağıyevin doğum haqqında şəhadətnaməsində əldə olunan mənbələrə görə 1823-cü il qeyd olunub: “Ancaq Azərbaycan Milli Elmlər Akademiyasının Tarix İnstitutunda hər iki mənbədən – həm 1823-cü il, həm də 1838-ci ildən istifadə olunur. Hər iki mənbə də əsas sayılır. Hər iki versiyanın özünün əsasları var. Biri doğum haqqında şəhadətnaməyə, digəri isə qohumlarının xatirələrindən, təxmini hesablamalarından əldə olunan mənbəyə əsaslanır”.
Qeyd olunub ki, Hacı Zeynalabdin Tağıyevin yaşadığı dövrdə kargüzarlıq sistemi formalaşmadığı üçün üstəlik doğum haqqında şəhadətnaməni əldə olan istinadlara əsasən sonradan aldığına görə hər iki mənbədən də istifadə olunur.
“Buna görə də Hacı Zeynalabdin Tağıyevin dəqiq anadan olduğu tarix tam bəlli deyil”, – qeyd olunub.
