Dövlət Neft Şirkətində ötən il baş verən qəzaların statistikası açıqlanıb. Ötən il neft sektorunda 19 ölüm faktı qeyd alınıb.
Bu barədə virtualaz.org saytına Neftçilərin Hüquqlarının Müdafiəsi Təşkilatının sədri Mirvari Qəhrəmanlı məlumat verib.
M.Qəhrəmanlının sözlərinə görə, 5 ildir ki, şirkətin bütün müəssisələrində əməyin mühafizəsi üzrə müavin vəzifəsi var. Onlar birbaşa baş verən qəzalara görə məsuliyyət daşıyırlar. Lakin istehsalat qəzalarının sayı azalmır.
Ötən il neft sektorunda 3 intihar hadisəsi də baş verib. “Bahar enerji” şirkətində işdən çıxarılan Etibar Kövsərov özün asaraq intihar edib. “Neftqaztikintitresti”nin işçisi İsmayıl Umudov ixtisar xəbərini eşidəndən sonra ürəyi partlayıb, “Balaxanı” şirkətinin işçisi Hafiz Qasımov özünü iş yerində traktorun altına atıb.
M.Qəhrəmanlı bidirdi ki, “Nərimanov” adına NQÇİ-nin 4 əməkdaşı qəza zamanı dünyasını dəyişib. “Neftqaztikintitresti”nin 7, “Tağıyev” adına NQÇİ-nin 2, Siyəzən MKQİ-nın 1 əməkdaşı istehsalatda ölüb. Bundan əlavə, “Qarasu” əməliyyat şirkətinin 1, “Suraxanıoil” şirkətinin 1 əməkdaşı da iş yerində dünyasını dəyişib.
Ötən il qəzalarla da yadda qalıb. “Azneft” İstehsalat Birliyinin strukturuna daxil olan idarə və müəssisələrdi 4 qəza hadisəsi qeydə olunub. Qəzanın əsas səbəbi isə SSRİ-dən qalan infrastrukturların tam köhnəlməsidir.
Ötən ilin martında Neft Daşlarında (Çvonovo 203-də) köhnə estakada uçub. 4 nəfər suya düşüb. Onlardan 3-ü çıxıb, biri həlak olub.
Oktyabrın 23-də N.Nərimanov adına NQÇİ-nin 441-ci meydançanın uçması nəticəsində orada təmir işləri aparan “Neftqaztikintitresti”nin 4 işçisi dənizə düşərək boğulub. Həmin vaxt ərazidə 30 nəfər işçi olub.
Oktyabrın sonunda yenə də N.Nərimanov adına NQÇİ-də estakada meydançası uçub. Xəsarət alan olmayıb.
Noyabrın 7-də N.Nərimanov adına NQÇİ-də 2-ci mədən ərazisində 310 və 312-ci meydançalar arasında 60 metr uzunluğunda estakadanın uçması nəticəsində 5 işçi dənizə düşüb. Dənizə düşən işçilərdən 3-ü xilas olunub, 2-si həlak olub.
Əmək xəsarəti alan və vəfat edən işçilərin 50 faizindən çoxu “Neftqaztikinti” trestinə aiddir.
Hüquq müdafiəçisi bildirdi ki, Xəzər təchizat müəssisəsi öz əməkdaşı Qurban Qurbanovun iş zamanı istehsalat xəsarəti alması hadisəsini gizlədib.
