Nigeriya və Fransa rəqəmsal və yaradıcı təşəbbüslərə investisiya proqramı çərçivəsində 600 milyon dollarlıq müqavilə imzalayıb.
Elchi.az xəbər verir ki, rəqəmsal və yaradıcı təşəbbüslərə investisiya proqramı çərçivəsində sazişi Nigeriyanın Rabitə, İnnovasiya və Rəqəmsal İqtisadiyyat naziri Bosun Tijani və Fransa Xarici İşlər Naziri Ketrin Kolonna imzalayıb.
Tijani və Kolonna proqramın gənc nigeriyalılara müsbət təsir göstərəcəyini və davamlı məşğulluq imkanlarının yaradılmasına töhfə verəcəyini vurğuladılar.
Nazir Kolonna qeyd edib ki, rəqəmsal texnologiya və yaradıcı sənayelər Nigeriyada iş yerləri yaratmaq və iqtisadi artımı stimullaşdırmaq üçün böyük potensiala malikdir.
“Bu müqavilənin texnologiya və yaradıcı sənaye sektorlarında 65 mindən çox yeni müəssisə, 150 min birbaşa iş yeri və təxminən 1,3 milyon dolayı iş yerinin yaradılması və 40 faizi qadınlardan ibarət olan təxminən 2 milyon gəncin təlimə cəlb edilməsi gözlənilir”-Kolonna deyib.
Tijani bəyan edib ki, Nigeriya hökuməti Fransa hökumətinin ölkə iqtisadiyyatının böyüməsini təşviq etmək səyləri çərçivəsində onlarla əməkdaşlıq qərarını alqışlayır.
Nuranə Məmmədova
