Elchi.az BBC News-a istinadən xəbər verir ki, Böyük Britaniyanın Nottingem şəhərində silsilə hücumlar nəticəsində 3 nəfər ölüb, daha 3 nəfər yaralanıb.
Nottingem şəhər mərkəzindən qərbdə, “Ilkeston Road”da iki nəfərin meyiti saat 04:00-dan sonra tapılıb.
Başqa bir insidentdə isə mikroavtobus şəhərin mərkəzindəki Milton küçəsində 3 nəfərin üzərinə sürməyə cəhd edib. Onların hamısı xəstəxanaya aparılıb.
Avtomobillə təxminən 10 dəqiqəlik məsafədə yerləşən Maqdala yolunda da bir kişi ölü tapılıb.
Polis hər üç ölümü əlaqələndirir. 31 yaşlı kişi “Bentinck Road”-da qətldə şübhəli bilinərək həbs edilib və o, hələ də polis nəzarətindədir.
Hadisənin terrorla əlaqəli olub-olmadığı barədə hələlik məlumat yoxdur. Polis istintaqın ilkin mərhələdə olduğunu və hücumların arxasındakı motivi araşdırmaq lazım olduğunu bildirib.
Nuranə Məmmədova
