Prezident Obamanın son bəyanatı belə düşünməyə ciddi əsas verir
Barak Obama dəfələrlə bəyan etmişdi ki, ABŞ-ın quru qoşunları İŞİD-lə müharibədə iştirak etmək üçün İraqa yeridilməyəcək. Məhz Respublikaçılar Partiyasının təmsilçisi olaraq son seçkidə prezident Obama ilə yarışmış Mitt Romni bu bəyanata kəskin etirazını bildirmişdi. 2003 – 2007-ci illərdə Massaçusets ştatının qubernatoru olmuş iş adamı bildirib ki, Amerika prezidenti bəri başdan öz niyyəti barədə İŞİD-i məlumatlandırmaqla böyük xətaya yol verib.
Avstraliyanın Brisbane şəhərində keçirilmiş G-20 sammitində isə prezident Obama İraqa quru qoşunlarının yeridilməsi ilə bağlı yeni bir şərt irəli sürdü. Azərbaycan mediasının o qədər də diqqət göstərmədiyi bu şərt son dərəcə ilgınc xarakterli hesab oluna bilər. Belə ki, ABŞ prezidenti bildirdi ki, əgər İŞİD nüvə silahı ələ keçirə bilsə, o, quru qoşunlarının da müharibəyə cəlb olunmasına göstəriş verəcək.
Bu bəyanat ortaya xeyli suallar çıxardı. Əslində cənab Obama etiraf edir ki, İŞİD nüvə silahı əldə etmək gücündədir. Təbii ki, İŞİD nüvə silahını istehsal edə bilməz. Deməli, onlar mövcud olan nüvə arsenalını ələ keçirməklə buna nail ola bilərlər. İslam aləmində isə yalnız Pakistanın nüvə silahı var. İran və Səudiyyə Ərəbistanı isə nüvə silahı əldə etməyə can atır. Nəzəri baxımdan, Yaxın Şərqdə nüvə silahına malik olan İsraildən də nüvə silahını əldə etmək olar. Ancaq bu, qeyri-mümkün hesab olunmalıdır. Çünki İsrail güclü orduya sahibdir, ən başlıcası isə Qərb buna heç cür imkan verə bilməz. Ona görə də ən ağlabatan variant Pakistanla bağlıdır. Bəllidir ki, ABŞ və digər Qərb ölkələri dəfələrlə Pakistanın sahib olduğu nüvə silahının terrorçuların əlinə keçə biləcəyi ilə bağlı öz narahatlıqlarını dilə gətiriblər. Bu dəfə isə Pakistanın adı hallanmır. Ancaq məntiq bunu deməyə əsas verir ki, ABŞ hələ də Pakistanın nüvə arsenalının toxunulmazlığına əmin deyil. Zatən, terrorçular da dəfələrlə Pakistanın nüvə silahını ələ keçirəcəkləri ilə bağlı bəyanatlar veriblər.
İŞİD-in əlinə nüvə silahının keçməsi isə dünyanın böyük bir təhlükə ilə üz-üzə qalması deməkdir. Ona görə də Obama nüvə məsələsini keçilməsinə imkan verilməyəcək “qırmızı xətt” elan edib.
Elbəyi Həsənli
