Azərbaycanda daşınmaz əmlakın satışından vergi tutulması qaydaları dəyişəcək. Fins.az-ın məlumatına görə, bu barədə Vergilər Məcəlləsinə edilən dəyişikliklərdə nəzərdə tutulur. Məcəlləyə dəyişikliklər Milli Məclistərəfindən qəbul edilib, təsdiqlənmək üçün prezidentə təqdim edilib və təsdiqlənəcəyi təqdirdə gələn ilin əvvəlindən qüvvəyə minəcək.
Beləliklə, məcəlləyə edilən dəyişikliklərə görə, kommersiya obyektinin satışı zamanı onun hər kvadratmetrinə görə, 22,5 manat həcmində vergi tutulacaq. Amma bu məbləğ baza rəqəmdir, yəni obyektin yerləşdiyi ərazilərdən asılı olaraq verginin məbləği artıb azalacaq.
Məsələn şəhərin mərkəzi hisəssindəki kommersiya obyektləri satılanda vergi tutulması üçün 4 əmsalı tətbiq ediləcək. Yəni obyektin hər kvadratmetrinə görə, 90 manat (22,5 manat X 4 əmsal) tutulacaq. 2-ci zonada hər kvadratmetrdən 67,5 manat (22,5 manat X 3 əmsal) və s. Şəhər kənarındakı ərazilərdə (10-11-12-ci zonalarda) obyektlər satıldıqda isə hər kvadratmetrdən 27 manat (22,5 manat X 1,2 əmsal) vergi tutulacaq.
Cədvəl 1. Bakı şəhərində kommersiya obyektlərinin satışından verginin tutulması üzrə tətbiq ediləcək əmsallar
| Bakı şəhəri üzrə zonalar | Əmsallar |
| 1 | 4,0 |
| 2 | 3,0 |
| 3-4 | 2,2 |
| 5-6 | 1,8 |
| 7-8-9 | 1,5 |
| 10-11-12 | 1,2 |
Ölkənin digər şəhər və rayonlarındakı kommersiya obyektləinin satışı zamanı vergi tutulması üçün isə fərqli əmsallar tətbiq ediləcək. Obyektin harada yerləşməsindən asılı olaraq bu əmsallar 0,5-1,5 arasında dəyişəcək.
Gəncə, Sumqayıt, Xırdalan üçün 1,5 əmsalı, Abşeron rayonunun qəsəbə və kəndləri (Xırdalan şəhəri istisna olmaqla), eləcə də, Şirvan, Mingəçevir, Naxçıvan, Lənkəran, Yevlax, Şəki və Naftalan şəhərləri üçün 1,2 əmsalı, digər rayon (şəhər) və qəsəbələr (kəndlər) üçün isə 0,5 əmsalı tətbiq olunacaq.
Məsələn, Gəncə, Sumqayıt və Xırdalanda kommersiya obyekti satılarkən onun hər kvadratmetrinə görə 33,75 manat (22,5 manat X 1,5 əmsal) vergi tutulacaq. Şirvan və Mingəçevirdə satılan obyektlərin hər kvadratetri üçün 27 manat (22,5 manat X 1,2 əmsal) vergi ödəniləcək.
Digər şəhər və rayonlarda satılan obyektlərin hər kvadratmetrinə görə, 11,25 manat vergi tutulacaq. Qeyd edək ki, söhbət hazır obyektlərin satışı zamanı tutulan vergidən gedir.
Cədvəl 2. Digər şəhər və rayonlarda kommersiya obyektlərinin satışından verginin tutulması üzrə tətbiq ediləcək əmsallar
| Ölkə üzrə ərazilər | Əmsallar |
| Gəncə, Sumqayıt, Xırdalan | 1,5 |
| Abşeron rayonunun qəsəbə və kəndləri (Xırdalan şəhəri istisna olmaqla) | 1,2 |
| Şirvan, Mingəçevir, Naxçıvan, Lənkəran, Yevlax, Şəki və Naftalan şəhərləri | 1,2 |
| Digər rayon (şəhər) və qəsəbələr (kəndlər) | 0,5 |
