Nəriman Abbasoğlunun anası prezidentə müraciət etdi
Fevralın 25-də Ali Məhkəmədə hakim İnqilab Nəsirovun sədrliyi ilə Abbasoğlu Nəriman İsrafil oğlunun barəsindəki hökmdən verdiyi kasasiya şikayətinə baxılacaq. N.Abbasoğlu 2012-ci ildə MTN-in Antiterror Mərkəzinin əməkdaşları tərəfindən həbs olunub.
Barəsində Bakı Ağır Cinayətlər Məhkəməsinin hökmü ilə 10 il azadlıqdan məhrumetmə cəzası çıxarılıb.
N.Abbasoğlu “Eurovision-2012″ mahnı yarışması ərəfəsində prezidentə sui-qəsdə cəhdə hazırlıqda, Milli Təhlükəsizlik Nazirliyinin polkovnikini öldürməkdə və digər ağır cinayətlərdə ittiham olunan 29 nəfərlik dəstənin üzvü kimi məhkəmə qarşısına çıxarılsa da, faktiki, onun digər 28 nəfərə aidiyyətinin olmadığı məhkəmədə də təsdiqlənib.
Lakin cinayət işinin MTN-də istintaq olunmasını nəzərə alan hakimlər N.Abbasoğlunu 10 il müddətinə azadlıqdan məhrum ediblər. N.Abbasoğlunun həbsində müstəsna rolu olan, artıq buraxılmış MTN-in Antiterror Mərkəzinin rəisi Elçin Quliyev də vəzifə səlahiyyətlərini aşma və digər ittihamlarla həbsdədir.
N.Abbasoğlunun anası Nəsibə Cahangir qızı Əsgərova məhkəmə öncəsi prezident İlham Əliyevə müraciət etməklə oğlunun günahsız olduğunu diqqətə çatıdırıb və onun azad edilməsi üçün ədalətli qərar çıxarılmasını istəyib. Redaksiyamıza təqdim olunan həmin müraciətin surətini bəzi ixtisarlarla təqdim edirik:
“Prezident İlham Əliyevin ”MTN işi” barədə bizi heyrətə gətirən çıxışından 4 ay keçir. Ancaq MTN tərəfindən böhtan atılmaqla qanunsuz həbs olunan Abbasoğlu Nəriman İsrafil oğlu hələ də azadlığa çıxmayıb. Biz, N.Abbasoğlunun ailəsi inanırıq ki, ölkə başçısının önəm verdiyi haqqın bərpası kimi ləyaqət hadisəsi ədalət məhkəmələrinin apardığı 5-10 epizodla bitməyəcək, qeyri-qanuni həbs olunmuş bütün zərərçəkən insanları əhatə edəcək. Mən anayam. Nəriman 3 bacının yeganə övladıdır”.
Nəsibə Əsgərova oğlunun həbsinin gerçək səbəbini də qeyd edir: “Oğlum 2008-ci ildə ”Bakı şəhəri Teatr və Konsert Biletlərinin Mərkəzləşdirilmiş Satış Sistemi layihəsi”ni yaratdı. O, bu layihəsi ilə qürur duyurdu. 2012-ci ilin martında MTN-in Antiterror Mərkəzinin əməkdaşları Nərimana təmsil etdiyi şirkətin satış sisteminə daxil olmaq, şirkətin gəlirlərinə nəzarət etmək üçün şərait yaratmasını tələb ediblər. Bu məqsədilə ofisə gəlib onunla söhbət aparıblar. Oğlum bunun qanunsuz olduğunu deməklə razı olmayıb və aralarında yaranan qarşıdurma öz pik nöqtəsinə çatıb. Nərimanın inadkarlıqla apardığı mübarizə onun böhtan atılıb həbs olunması ilə nəticələndi. Oğlum bu sistemin yaradıcısı kimi həbs olunana qədər həmin sistemi və serveri idarə edirdi”.
Nəsibə Əsgərova yazır ki, bundan sonra yaşadıqları ünvana basqın olub və oğlu şərlənərək həbs olunub:“Oğlum dünyəvi baxışı və tolerantlığı ilə tanınsa da, bu, MTN-çilərə onu adını belə eşitmədiyi Vüqar Padarovun ”Dini-silahlı birləşməsinin üzvü” kimi həbs etməyə mane olmadı. Onun ailəsi dağıldı, özünü MTN-də verilən işgəncələrlə şikəstə çevirdilər. Bu gün oğlumun qanunsuz həbsinə birbaşa göstəriş verən general Elçin Quliyev və qeyriləri törətdikləri qanunazidd əməllərinə görə cinayət məsuliyyətinə cəlb olunublar. Oğlum isə 3 il 10 aydır etmədiyi əmələ görə Qobustan həbsxanasında cəza çəkir”.
