Baş nazir Şahbaz Şərif əzəli rəqib Hindistanı, yolunda maneələr yaratmaq əvəzinə, çoxmilyardlıq Çin-Pakistan İqtisadi Dəhlizinin (CPEC) infrastruktur layihəsindən faydalanmağa çağırıb.
Elchi.az “Geo News”-a istinadən xəbər verir ki, Baş nazir bunu çərşənbə günü “CPEC”-in 10 illik fəaliyyətinin başa çatması münasibətilə verdiyi bəyanatda deyib.
O, layihənin əhəmiyyətini vurğulayaraq, İran, Əfqanıstan, Yaxın Şərq və bütün regionun da meqa-inkişaf layihəsindən faydalanacağını bildirib.
Baş nazir Pakistan və Çin rəhbərliyini və xalqını iki “dəmir qardaş” arasında həmişəyaşıl və etibarlı strateji əməkdaşlıq tərəfdaşlığının yeni səhifəsi olan “CPEC”-in 10 illik tamamlanması münasibətilə təbrik edib.
Onun sözlərinə görə, “CPEC” həm də Pakistan və Çin arasında qarşılıqlı tərəfdaşlığın yeni dövrünün başlanğıcını qoyub və onların ikitərəfli münasibətlərini möhkəmləndirib.
Baş nazir Şahbaz bildirib ki, “CPEC” su təchizatından tutmuş təhsilə, texniki və bacarıqlara əsaslanan təlimlərə qədər bir çox layihələri əhatə edir.
Doqquz Xüsusi İqtisadi Zonanın (XİZ) tikintisi ilə yeni texnologiyanın Pakistana ötürüləcəyini və nəticədə yerli istehsalın artmasına kömək edəcəyini söyləyib.
Baş nazir həmçinin layihənin Milli Fəlakətlərin İdarə Edilməsi Təşkilatının (NDMA) və təbii fəlakətlər üçün erkən xəbərdarlıq sisteminin effektivliyinə təsirlərini vurğulayıb, çünki onlar “CPEC”-in bir hissəsidir.
Eyni şəkildə, o, ərzaq təhlükəsizliyini təmin etmək üçün kənd təsərrüfatı ilə bağlı layihələrin də “CPEC”-ə daxil edildiyini bildirib.
Nuranə Məmmədova
