Azərbaycan Respublikasının Pakistandakı səfirliyi İslamabad şəhərinin Serena mehmanxanasının təşkilatçılığı ilə keçirilən “Novruz və Yaz Festivalı” adlı mərasimdə iştirak edib.
Səfirlikdən Elchi.az-a verilən xəbərə görə, mərasimdə Azərbaycan səfirliyi ilə yanaşı, Novruz bayramını qeyd edən ölkələrin səfirlikləri – Türkiyə, İran, Qazaxıstan, Qırğızıstan, Tacikistan və Özbəkistan da iştirak ediblər.
Xarici ölkələrin Pakistandakı səfirlərinin, diplomatların, ictimaiyyətin və media mənsublarının qatıldığı tədbirdə təmsil olunan Azərbaycan Respublikasının Pakistandakı səfirliyi ölkəmizin mədəniyyətini, milli və mənəvi dəyərlərini, habelə mətbəxini təcəssüm etdirən nümunələri təqdim edib, həmçinin turizm potensialını əks etdirən fotolar və əyani materiallar nümayiş etdirib.
