Dağlıq Qarabağ məsələsi Ermənistan-Azərbaycan arasında sərhədlərin delimitasiyası və təhlükəsizliyi üzrə milli komissiyaların fəaliyyətinə aid deyil.
Elchi.az xəbər verir ki, bu barədə Ermənistanın baş naziri Nikol Paşinyan “Əl-Cəzirə” telekanalına müsahibəsində bildirib.
Paşinyan qeyd edib ki, İrəvan və Bakının müxtəlif rabitə formatları var və bu formatlardan biri delimitasiya məsələsinə aiddir.
Baş nazirin sözlərinə görə, Ermənistan-Azərbaycan dialoqunun ikinci istiqaməti İrəvanla Bakı arasında münasibətlərin normallaşdırılması formatıdır.
“Regional nəqliyyat və iqtisadi kommunikasiyaların blokdan çıxarılması üçün üçüncü istiqamət də var. Amma təbii ki, regionda sülhün bərqərar olması üçün ən vacib məsələ Dağlıq Qarabağ məsələsidir”, – o əlavə edib.
Jurnalistin “Rusiya bu prosesdə Azərbaycana daha çox dəstək verir” sualına Ermənistan Nazirlər Kabinetinin rəhbəri vurğulayıb ki, “Rusiya Ermənistanın strateji tərəfdaşı və müttəfiqidir, lakin onun Azərbaycanla da çox yaxın münasibətləri var”.
O qeyd edib ki, bu halda Rusiyanın Dağlıq Qarabağda hərbi əməliyyatların dayandırılması ilə bağlı 10 noyabr 2020-ci il tarixli üçtərəfli bəyanatının həyata keçirilməsində qarant kimi rolu görünür.
