Koronavirus peyvəndlərinin təhlükəsizliyi uzun müddətdir, müzakirə mövzusu olub. Bu fonda peyvənd istehsalçılarından biri olan “Pfizer”dən səs-küylü açıqlama gəlib.
Elchi.az bildirir ki, bu gün Avropada fəaliyyət göstərən bir çox əczaçılıq şirkətlərinin rəhbərləri və rəsmilərinin iştirakı ilə Avropa Parlamentində (AP) iclas keçirilib.
Əczaçılıq şirkətləri Avropa Parlamentinin deputatları tərəfindən sorğulanıb. Sessiyaya qatılan “Pfizer” rəsmilərindən birinin koronavirusa qarşı vaksinlərlə bağlı etirafı isə gündəm olub.
Belə ki, parlamentin hollandiyalı üzvü Rob Roos “Pfizer” rəsmisinə “Koronavirus peyvəndi istifadəyə verilməmişdən əvvəl xəstəliyin yayılmasının qarşısını alıb-almaması istiqamətində sınaqdan keçirilibmi? Əgər sınaqdan keçirilibsə, məlumatları komissiyamızla bölüşmək mümkündürmü?” sualını ünvanlayıb. O həmçinin, suala aydın cavab tələb edərək, “Bəli və ya yox. Cavab verin”, deyə bildirib.
“Pfizer” rəsmisi isə sınaqların aparılmadığını deyib: “Bazara çıxmazdan əvvəl peyvəndlərin yoluxmanın qarşısını alıb-almadığını bilirdikmi? Xeyr. Biz elmin sürəti ilə hərəkət etməli və bazarın necə işlədiyini öyrənməli idik”, deyə o söyləyib
