“İrandakı etnik azərbaycanlıların da haqqları var ki,
onların mühüm tarixi keçmişi ilə bağlı izlər bu ölkənin pul vahidinin üzərində öz əksini tapsın.
İran parlamentinin Təbrizdən olan millət vəkili Məhəmməd İsmail Səidi ölkədə pulların üzərində Şərqi Azərbaycan əyalətinin və Təbriz rəmzlərinin çap olunmasını tələb etməsi barədə xəbəri saytımızda dərc etmişdik.
M.İ.Səidi İran Mərkəzi Bankının sədri, eləcə də iqtisadiyyat və maliyyə nazirlərinə məktub yazaraq onlardan Təbriz əhalisinin istəyinə hörmətlə yanaşmalarını və pulun üzərində Azərbaycan rəmzlərinin çapı üçün tez bir zamanda göstəriş vermələrini xahiş etmişdi.
Bəs təklifin həyata keçməsi mümkündürmü?…
Politoloq Elman Nəsirov Ölkə.az-a səslənən təklifin prinsip etibarı ilə baxılmasının mümkün olduğunu bildirib.
“Məlum olduğu kimi İran parlamentində əslən azərbaycanlı deputat İranın pul vahidinin üzərində Şərqi Azərbaycanla bağlı müəyyən rəmzlərin öz əksini tapması məsələsini gündəmə gətirib. Hesab edirəm ki, İranın pul vahidi üzərində müxtəlif rəmzlərin əksini tapdığı reallığını nəzərə alsaq, bu təklifin özündə təccübləndirəcək heç bir şey yoxdur. Tamamilə anlaşılan bir təklifdir. Xüsusən də, nəzərə alsaq ki, İranda 75 milyonluq əhalinin təxminən 35 milyondan çoxu azərbaycanlılar təşkil edirlər, bu nöqteyi-nəzərdən hesab edirəm ki, onların təklifinin əsası var və bu məsələyə prinsip etibarı ilə baxılması mümkündür. Burada heç bir siyasi motiv görmürəm, sadəcə oradakı etnik azərbaycanlıların da haqqları var ki, onların da mühüm tarixi keçmişi ilə bağlı izlər özlərini pul vahidində göstərsin.
Ona görə də bu təklifə iranlı parlamentarilərin müsbət münasibət bəsləyəcəyini düşünürəm.
Həsən Rühani hələ prezident seçkisi öncəsi qeyd etmişdi ki, o, bütün etnik qrupların fəaliyyətinə şərait yaradacaq. Ona görə də bu məsələdə müsbət mövqe bildirmələri çox uyğun addım olardı”.
Qeyd edək ki, İran parlamentinin Təbrizdən olan nümayəndəsi çıxışında çox qədim zamanlardan indiyədək Şərqi Azərbaycan əyalətinin və Təbrizin ölkədəki iqtisadi, siyasi, mədəni və milli birlik proseslərində önəmli yeri olduğunu və ölkədə çap olunan əskinasların üzərində müxtəlif rəmzlər çap olunmasına baxmayaraq, Azərbaycan rəmzlərinin heç bir pul üzərində olmamasını təssüf hissi ilə ifadə etmişdim.(Ölkə.az)
