“İkinci Qarabağ Müharibəsindən sonrakı proseslər ölkədəki sosial-iqtisadi inkişafı stimullaşdırmaqla bərabər siyasi islahatların da keçirilməsini zərurətə çevirir. Dəyişən dəyərlər sistemi, ənənəvi düşüncələrdən yaxa qurtarmaq, idarəetmədə və dövlət-cəmiyyət münasibətlərində yeniliklərin həyata keçirilməsini qaçılmaz edir”- bu sözləri Elchi.az saytına müsahibəsində siyasi elmlər üzrə fəlsəfə doktoru, dosent Ramid Hüseynov deyib.
O, açıqlamasında artıq daha sivil, demokratik, yeni idarəetmə modelinin tətbiq olunmasına ehtiyacı ortaya qoyduğunu da qeyd edib: “Belə olan təqdirdə qərbə inteqrasiya prosesinin daha da sürətləndirilməsi ən optimal seçim olaraq qiymətləndirilə bilər. Heç şübhəsiz ki, Qərbin qəbul etmədiyimiz və milli mənəvi dəyərlərimizlə ziddiyyət təşkil edən müəyyən adət-ənənələrinin, norma və prinsiplərinin mövcudluğu bizi narahat edir. Amma Qərbin həm də müasir texnologiyanın, təhsilin, elmin, demokratik dəyərlərin, insan hüquq və azadlıqlarının, sosial ədalətin daha çox inkişaf etdiyi bir məkan olduğunu da bilməliyik. Bu baxımdan inteqrasiyanı daha düzgün və düşünülmüş, milli maraqlarımıza uyğun şəkildə həyata keçirməyimiz gələcək inkişafımız, təhlükəsiz, ədalətli və demokratik dəyərlərin daha yaxşı təmin olunduğu cəmiyyətdə yaşamağımız üçün əhəmiyyətlidir.
Məhz Azərbaycan dövlət başçısının Münhen Təhlükəsizlik Konfransında iştirakını və mühüm görüşlər keçirməsini kifayət qədər önəmlidir. Ölkə rəhbərinin ikitərəfli görüşlər keçirməsi, müxtəlif toplantılarda ənənəvi və bərpaolunan enerji sahəsində və enerji təhlükəsizliyin təmin olunması ilə bağlı çıxışlar etməsi kifayət qədər maraqlıdır. Bu cür görüşlər həm də ölkənin ənənəvi güclərin təsirindən çıxmaqla, qərbə inteqrasiya prosesinin sürətlənməsi, ölkənin müsbət imicinin daha da yaxşılaşdırılması baxımından da nüfuzunu artırır.
Nəzərə alsaq ki, tədbirin keçirildiyi Almaniya Avropanın və ümumilikdə dünyanın ən inkişaf etmiş, güclü və dayanıqlı iqtisadiyyata, müasir hərbi silah və texnologiyanın mövcud olduğu orduya, sosial rifahın, yüksək mədəniyyətin, təhsilin təmin olunduğu ədalətli cəmiyyətə malik dövlətlərdən biridir. Deməli bu platformadan istifadə etməklə, həm də Almaniya ilə münasibətlərin genişləndirilməsi: təkcə enerji resurslarının birtərəfli qaydada ixracı deyil, ticari, iqtisadi, siyasi, mədəni və digər sahələrdə əlaqələrin mövcud imkanlardan səmərəli və effektiv istifadə edilməsi, o cümlədən, regional təhlükəsizliyin təmin olunması baxımından önəmlidir”.
Havar Şəfiyeva
