Qərb ölkələrinin Rusiyanın guya Avropaya hücum planları ilə bağlı bəyanatları cəfəngiyyatdır. Elchi.az xəbər verir ki, bu sözləri Rusiya lideri Vladimir Putin Qostiny Dvorda Federal Məclisə müraciətini açıqlayarkən deyib.
“İndi onlar heç bir xəcalət çəkmədən bəyan edirlər ki, guya Rusiya Avropaya hücum etmək niyyətindədir. Yaxşı, siz və mən bunu sadəcə başa düşürük, onlar boş-boş danışırlar”, – prezident bildirib.
Putinin sözlərinə görə, Qərbin özü Rusiya ərazisinə zərbələr endirmək və NATO qoşunlarını Ukraynaya göndərmək planlarını həyata keçirir. “Biz vaxtilə ölkəmizin ərazisinə kontingent göndərənlərin taleyini xatırlayırıq. Amma indi mümkün müdaxiləçilər üçün nəticələr daha faciəli olacaq”, – Putin yekunlaşdırıb.
Qeyd edək ki, bundan əvvəl Fransa prezidenti Emmanuel Makron bildirib ki, Avropada təhlükəsizliyin bərqərar olması üçün Rusiyanın Ukrayna münaqişəsində məğlub olması zəruridir.
Havar Şəfiyeva
