Rusiya prezidenti Vladimir Putin Çin Media Korporasiyasına müsahibəsində bildirib ki, Ukrayna tərəfi sülh danışıqlarını qadağan edən fərmanı ləğv edərsə, Moskva Kiyevlə danışıqlara hazırdır.
Elchi.az bu barədə TASS-a istinadən xəbər verir.
O qeyd edib ki, Rusiya Çinin Ukraynada sülh yolu ilə nizamlanmasına dair təkliflərini yüksək qiymətləndirir .
Putin Pekinin təkliflərini kifayət qədər real hesab edir. Rusiya prezidenti bildirib ki, onlar sülh sazişləri üçün əsas kimi istifadə edilə bilər.
Eyni zamanda o xatırladıb ki, Kiyev heç bir danışıqlar aparmaq istəmir və Vladimir Zelenski Rusiya ilə sülh danışıqlarını qadağan edən fərman verib.
“Onlar istəmirlərsə və hətta bu danışıqları qadağan edən normativ sənəd veriblərsə, siz necə danışıqlar apara bilərsiniz?” – prezident bildirib.
O, izah edib ki, əgər Ukrayna tərəfi danışıqlar aparmaq istəyirsə, o zaman bu fərmanı ləğv etməklə və dialoqa hazır olduğunu bəyan etməklə başlamaq lazımdır.
“Biz çinli dostlarımızın təkliflərindən istifadə etməyə hazırıq”, – Putin bildirib.
Nuranə Məmmədova
