Ötən ilin 27 sentyabrında Silahlı Qüvvələrin Ali Baş Komandanı cənab İlham Əliyevin rəhbərliyi altında, müzəffər Azərbaycan ordusunun həyata keçirdiyi uğurlu əks-hücum əməliyyatları 44 gün ərzində Azərbaycanın qələbəsi ilə yekunlaşdı.
Müharibənin ilk günlərindən əldə olunan milli birlik, xalqımızın əzmkarlığı və s. döyüşkən ordumuza, sanki əlavə güc də verdi. Qeyd edək ki, yağı düşmənin tapdağı altında qalmış torpaqlarımızda doğulub boya-başa çatan, bu gün isə icra başçısı vəzifəsini daşıyan tək-tək şəxslər var ki, onlardan biri də Ağdam RİH-nin başçısı Vaqif Həsənovdur.
Yada salaq ki, ötən il Türk ordusu ilə Azərbaycan ordusu cəbhəboyu ərazilərə yaxın yerlərdə hərbi təlimlərə başlayarkən, vaxtilə doğulub boya-başa çatdığı və yurd-yuvasından didərgin düşən Vaqif Həsənov da, məhz hərbi geyimdə hərbi kontingentin sıralarına qoşulur və hər gün işğal altında olan ərazilərimizin azad olunması uğurunda döyüşən müzəffər ordumuzun yanında olur. O, hərbi əməliyyatların başlamasından bir neçə gün öncə yüksək ruhla, qələbə əzmi ilə “Yaxın vaxtlarda biz çox sevindirici xəbərlər eşidəcəyik” deyirdi.
Çox keçmədi ki, bu şəxsin üstüörtülü səsləndirdiyi fikirlər, işarə etdiyi anonslar öz təsdiqini tapdı. Yəni, 44 gün ərzində itirilmiş torpaqlarımız yağı düşməndən təmizləndi, xalqımız “məğlub xalq” adını öz üzərindən götürdü. Qələbə xəbəri hər kəsin hədsiz sevincinə səbəb oldu ki, həmin anı unutmaq heç cür mümkün deyil.
Bəli, bu günlərdə çoxları kimi Vaqif Həsənov da, mənfur düşmənin tapdağından azad olunan doğma kəndini görmək, ürəyindən keçən sevgi hissini yaşamaq üçün doğma yurduna ziyarətə gedir. O, uşaqlıq illərində yaşadığı evlərinin qalıqlarını yanındakı şəxslərə göstərir, bəzi məqamları onlara ətraflı izah edir. Bu xoş anların video-görüntülərini müəyyən oxucu auditoriyasına çatdırmağı, nümayiş etdirməyi, sanki o, özü üçün borc bilir. Buna baxmayaraq, bəzi media nümayəndələri hansısa maraqlar çərçivəsində yayımlanan video-görüntünü qərəzli şəkildə başqa macəraya yönəldirlər, bir neçə xəbər portallarında və sosial şəbəkədə paylaşım da edirlər. Əslində jurnalistka ilə məşğul olan şəxslər ötən otuz ilə yaxın müddət ərzində işğal altında qalan torpaqlarımızın azad olunması xəbərinə sevinən şəxslər haqqında ortaya obyektiv yanaşma qoymalıdırlar. Təəssüflər olsun ki, bu video-görüntüləri yayanlar isə, məhz fərqli mövqe tutdular. Ona görə də həmin şəxslərin atdıqları addımlar qınanmalı və olduqca gülünc və lazımsız addım kimi də qiymətləndirilməlidir.
Xüsusi qeyd olunası hal odur ki, 44 gün davam edən uğurlu əks-hücum əməliyyatları zamanı vəzifəli şəxsin döyüş bölgəsində ordumuzun yanında olması, əsgər və zabitlərimizə mənəvi dəstəyini ifadə etməsi və s. kimi addımlarını atması, olduqca uğurlu addım kimi qiymətləndirilməlidir. Bu yöndə atılan addıma hansısa “don geydirmək”, heç də uğurlu addım hesab oluna bilməz.
Yayımlanmış videoya diqqətlə baxdıqda o da məlum olur ki, burada hansısa qəbahət bir iş yoxdur. Yəni, videodan məlum olur ki, Vaqif Həsənov sevincək halda dədə-baba yurdunun erməni vandalları tərəfindən necə viran edilməsindən, qalıqları qalmış evdə doğulub böyüməsindən, keçmiş günlərindən, uşaqlıq xatirələrindən və s. danışır. Bunu qərəzli şəkildə yayımlamaq, vətənpərvər insanlara xələl gəlsin deyə tirajlamaq, heç də düzgün hal ola bilməz. Əslində belə bir addımın atılması, bugünkü jurnalistikamızın “üzqaralığı”dır.
Gəlin, Vətəni sevən, onun hər qarış torpağına bağlı olan, bu yolda canından, qanından keçməyə hazır olan hər kəsə qarşı hörmətlə yanaşaq!
