Qərbin əsas müttəfiqləri, o cümlədən ABŞ Ukraynanı dəstəkləməkdən yorulmağa başlayıb və Kiyevə yardımın sonsuza qədər davam etməyəcəyini nümayiş etdirir. Elchi.az xəbər verir ki, bu barədə “The Washington Times” məlumat yayıb.
Qəzetin yazdığına görə, bəzi analitiklər Qərbin Ukraynaya dəstəyinin davam edəcəyini proqnozlaşdırır, lakin onlar narahatlıq doğuran səbəblərin artdığını, xüsusən də ABŞ-ın daha bir uzunmüddətli münaqişəyə qarışmaq istəyinin olmadığını etiraf edirlər.
“Düşünürəm ki, narahatlıqlar əsaslıdır. istər Əfqanıstandan yorğunluq, istər İraqdan yorğunluq, istərsə də Balkanlardan yorğunluq. Yorğunluq hər cür müharibənin, xüsusən də Birləşmiş Ştatlar və ya digər demokratik ölkələri əhatə edən bir vəziyyətdir. Olduqca tez yoruluruq, buna görə də tez nəticə istəyirik”, – ABŞ Müdafiə Nazirinin Avropa və NATO Siyasəti üzrə köməkçisinin keçmiş müavini Cim Taunsend bildirib.
Bir müddət əvvəl ABŞ dövlət katibi Entoni Blinken bildirmişdi ki, prezident Co Bayden Ukraynada böhranın eskalasiyası başlayandan Vaşinqtonu Rusiya ilə birbaşa münaqişəyə cəlb etməkdən yayınmağa çalışır. O bildirib ki, münaqişənin ilk günlərindən bu məsələ ilə bağlı qərarlar qəbul edərkən Bayden ABŞ-ın Ukraynanı dəstəkləmək və ölkələri buna cəlb etmək üçün əlindən gələni etdiyinə əminliyə arxalanır.
Havar Şəfiyeva
