Dövlət Torpaq və Xəritəçəkmə Komitəsinin ləğvi ilə Qərib Məmmədovun qələmi qırıldı.
Tia.az bildirir ki, Q.Məmmədovun hələ ki heç bir vəzifəyə təyinat almaması bu versiyanı bir qədər də doğruldur.
Bir müddət öncə prezident İlham Əliyevin qurum haqda iradlarını bildirməsi isə məsələni kökündən həll edib. Məlumatlı qaynaqdan verilən bilgiyə görə, qurumun ləğvi səbəbsiz deyil.
Q.Məmmədovun 14 il ərzində yol verdiyi nöqsanlar, torpaq hərracının genişləndirilməsi də qurumun ləğvinə təsir göstərir. Bundan başqa Q.Məmmədovun işinin ciddi təftiş olunduğu, 14 il ərzində satdığı torpaqların siyahısının hazırlanması da yer alan iddialar arasındadır.
Eyni zamanda bu qərar hakimiyyət daxilində qərbi azərbaycanlıların “təmizlənməsi” prosesi də sayıla bilər. Bildirək ki, ləğv edilmiş komitənin torpaqlarının monitorinqi ciddi korrupsiya faktlarının ortaya çıxması ilə nəticələnəcək.
1947-ci ildə Ermənistanın Amasiya rayonunun Yeniyol kəndində anadan olan Q.Məmmədov iqtidarda Qərbi Azərbaycandan olan nüfuzlu fiqurlardan hesab olunurdu. Onu hakimiyyətə mərhum prezident Heydər Əliyev gətirib. 1997-ci ilin iyununda o, Heydər Əliyevin sərəncamı ilə Dövlət Torpaq Komitəsinə rəhbər təyin olunub.
2001-ci ildə və 2004-cü ildə Dövlət Torpaq və Xəritəçəkmə Komitəsinə sədri təyin olunub. Qərib Məmmədovun rayonlarda olan şöbə mudirlərinə nəzarət edə bilmədiyi barədə mətbuatda dəfələrlə məlumat verilib.
