Avropa Liqasının qrup mərhələsinin VI turunda Bakıda “İnter”lə qarşılaşacaq “Qarabağ” klubu büdcəsini daha da zənginləşdirə bilər.
Qol.Az-ın məlumatına görə, Ağdam təmsilçisi İtaliya klubu ilə heç-heçə edəcəyi təqdirdə 100 min avro, qalib gələcəyi halda isə 200 min avro qazanacaq.
Qurban Qurbanovun komandası “İnter”lə görüşdə qələbə qazanmaqla qrup ikincisi kimi turnirin 1/16 final mərhələsinə vəsiqəni təmin edəcək. Bu qələbəyə görə 200 min avro qazanacaq “Qarabağ” klubu 1/16 final mərhələsindəki iştirakına görə də büdcəsini əlavə 200 min avro zənginləşdirəcək.
Ümumilikdə Avropa Liqasının 1/8 finalında oynayan 350 min avro, 1/4 finala yüksələn komanda isə 450 min avro gəlir əldə edəcək. Yarımfinalçı 1 milyon avro, finalçı isə 2,5 milyon avro ilə mükafatlandırılacaq. Avropa Liqasının qalibinə 5 milyon avro mükafat veriləcək.
Qeyd edək ki, Avroliqanın qrup mərhələsində hər qələbəyə 200 min avro, heç-heçəyə isə 100 min avro pul mükafatı ayrılıb. Aktivində 5 xalı olan “Qarabağ” klubu keçirdiyi 5 turun nəticəsinə görə (bir qələbə, iki heç-heçə) 400 min avro gəlir əldə edib.
«Qarabağ» – «İnter» oyunu dekabrın 11-də Tofiq Bəhrəmov adına Respublika Stadionunda keçiriləcək. Matçın start fiti 21-00-da çalınacaq.
