Yeganə yayılma mərkəzi Qarabağla məhdudlaşan nadir bitki növləri tədqiq olunacaq.
Bunu APA-ya AMEA-nın Botanika İnstitutunun direktoru, biologiya üzrə elmlər doktoru, professor Səyyarə İbadullayeva deyib.
S. İbadullayeva bildirib ki, yeganə yayılma mərkəzi Qarabağla məhdudlaşan nadir növlərin də “Qırmızı kitab”ın III nəşrinə salınması gözlənilir: “Sözsüz ki, hələlik Qarabağ ərazisini təftiş edə bilmirik, lakin minalardan təmizləndikdən sonra bu ərazilərə təkrar baxılmalıdır. Hər halda yeganə yayılma mərkəzi olan unikal floralara aid növlər qorunmalıdır. Aparılan çoxillik tədqiqatlar, müxtəlif botaniklər tərəfindən ərazidən toplanmış herbari materialları, bu sahəyə dair əsərlər, xüsusən monoqrafiyalar və şəxsən tərəfimizdən toplanmış herbari materiallarının kameral analizi nəticəsində bu say tam dəqiqləşəcək”.
Direktor bildirib ki, Qarabağda olan 121 növ bitki “Qırmızı kitab”ın nə I, nə də II nəşrinə daxil edilməyib
Qeyd edək ki, “Qırmızı kitab”ın III nəşri 2023-cü ildə çap olunacaq.
