Avqustun 25-i “Qarabağ” klubu Avropa Liqasının “pley-off” mərhələsində İsveçin “Göteborq” klubu ilə cavab matçına çıxıb.
Musavat.com-un məlumatına görə, Ağdam təmsilçisi doğma azarkeşlər önündə inamlı qələbə qazanaraq Avropa Liqasının qrup mərhələsinə vəsiqə qazanıb.
Matçın ilk dəqiqələrindən rəqibi təzyiq altında saxlayan Qurban Qurbanovun komandası istəyinə matçın 19-cu dəqiqəsində çatıb. Riçard Almeyda künc nöqtəsində topun arxasına keçib. Bundan sonra illərdir istifadə edilən və “Azərbaycansayağı ötürmə” adını qazanmış ev tapşırığı yerinə yetirilib. Kapitan Rəşad Sadıqov Con Alvbagenin qoruduğu qapıdan ilk topu keçirib – 1:0
Üstünlüyünü artıran meydan sahibləri 7 dəqiqə sonra azarkeşləri bir daha sevindirib. 26-cı dəqiqədə Dani Kintananın ötürməsini Muarem Muarem boş qapıya göndərərək hesab arasındakı fərqi artırıb – 2:0
Matçın 41-ci dəqiqəsində Muarem topu yenidən qapıya göndərsə də, rusiyalı hakim Vladislav Bezborodov epizodu oyundankənar vəziyyət kimi qiymətləndirib və qol qeydə alınmayıb.
İlk hissə bu hesabla da başa çatıb. Meydan sahibləri üstünlüyünü ikinci yarıda da davam etdirib. Oyunun 51-ci dəqiqəsində rollar dəyişib. Bu dəfə Muaremin ötürməsini Dani Kintana rəqib qapısına göndərib – 3:0.
Oyunun qalan dəqiqələrində qapılara qol vurulmayıb və İsveçdə keçirilmiş ilk oyunda 0:1 hesabı ilə məğlub olan “Qarabağ” 3:0 hesablı qələbə sayəsində ardıcıl 3-cü dəfə Avropa Liqasının qrup mərhələsinə vəsiqə qazanıb.
Matçın sonunda bəzi futbolçular öz formalarını daimi onların yanında olan, “İmarət Tayfa” fan klubunun üzvlərinə hədiyyə ediblər.
