Azərbayca Premyer Liqasının son qalibi “Qarabağ” qazandığı çempionluq kubokunu təmsil olunduğu Ağdam
rayonuna aparıb.
Qol.Az-ın məlumatına görə, “Qarabağ” Quzanlı qəsəbə stadionunda azarkeşlərlə görüş keçirib.
Tədbirdə çıxış edən rayon icra başçısı Raqub Məmmədov “Qarabağ”ın indiyədək keçdiyi tarix yol haqda danışıb.
Daha sonra “Qarabağ”ın vitse-prezidenti Tahir Gözəl fikirlərini bildirib. O, komandanın son uğurundan bəhs edib: “Qarabağ” azarkeşlərini salamlayıram. “Tvente”, “Real Sosyedad”, “Lion” kimi güclü komandalar Avroliqanın qrup mərhələsinə vəsiqə qazana bilmədi, amma biz bunu bacardıq. Bu uğurun davamını gətirmək istəyirik. Sizə söz verirəm ki, baş məşqçimiz Qurban Qurbanovun istəyəcəyi təqdirdə heyətə yeni futbolçular qatacağıq. Uğur qazanmaq üçün nə lazımdırsa, edəcəyik. Biz Ağdam adını Avroliqada layiqincə təmsil etmək niyyətindəyik. Qrup mərhələsində də xal toplamağa, adlı-sanlı rəqiblərdən xal almağa çalışacağıq”.
“Qarabağ”ın baş məşqçisi Qurban Qurbanov da komandasının Avroliqadakı uğurundan danışıb. O, daha böyük nailiyyətlər qazanmaq üçün çalışdıqlarını bildirib.
Tədbirin sonunda çempionluq kuboku ağdamlı azarkeşlərə təqdim edilib. Komanda doğma azarkeşlər önündə kuboku başı üzərinə qaldırıb.
