ABŞ hakimiyyəti Rusiyaya qarşı tətbiq edilən sanksiyalardan yayınma şübhələrinə görə Qırğızıstana qarşı iqtisadi tədbirlər hazırlayır. Elchi.az xəbər verir ki, bu barədə “The Washington Post” Amerika rəsmilərinə istinadən məlumat yayıb.
Qeyd edilir ki, bu yolla Qırğızıstanı Rusiyaya sanksiyaya məruz qalan malların ixracını dayandırmağa məcbur etmək istəyirlər. “ABŞ prezidenti Co Baydenin administrasiyası ölkəni bu ticarəti dayandırmağa məcbur etmək üçün yeni iqtisadi tədbirlər hazırlayır” materialda deyilir.
Nəşrin məlumatına görə, bu addımı atmazdan əvvəl amerikalı və avropalı diplomatlar dəfələrlə Bişkekdə olub, lakin bu, heç bir nəticə verməyib. Vaşinqtonun hazırladığı tədbirləri bu həftə açıqlaya biləcəyi vurğulanır.
Bundan əvvəl ABŞ-ın maliyyə naziri Canet Yellen bildirib ki, bu il Amerika rəhbərliyinin prioritetlərindən biri Rusiyanın ona qarşı tətbiq etdiyi sanksiyalardan yan keçmə cəhdləri ilə mübarizədir. O bildirib ki, Vaşinqton sui-istifadə hallarının qarşısını almaq üçün son aylarda göstərdiyi səyləri gücləndirir.
Havar Şəfiyeva
