Tədbir iştirakçıları qarşısında çıxış edən layihə rəhbəri Anar Məhərrəmov Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi, “Sosial İqtisadi İnkişafa Dəstək” İB, layihənin məqsədi, vəzifələri, peşə təhsilinin məşğulluğun artırılması və iqtisadiyyatın inkişafındakı rolu, gənclər təşkilatlarının diqqətinin peşə təhsilinin təbliğinə cəlb edilməsinin vacibliyi, regionda peşə təhsilinin təbliği üzrə sistematik maarifləndirmə işinin aparılmasının zəruriliyi və tədbirin proqramı haqda ətraflı məlumat verib.
Layihənin ekspertləri, Qəbələ DPTM-nin direktor müavini Reyhan Məmmədova və Təhsilalanlarla iş şöbəsinin baş mütəxəssisi, Karyera mərkəzinin rəhbəri Rufanə Yaralıyeva tərəfindən peşə təhsilinin fəaliyyət istiqamətləri, peşə seçimi və karyera, düzgün peşə seçiminin əhəmiyyəti, peşə təhsilinin prespektivləri, peşə təhsilində təhsil pillələri, peşə təhsil müəssisələrində təhsil müddəti və s. haqqında geniş məlumat verilib.
İştirakçılar layihəyə, tədbirin təşkilinə görə təşəkkür edərək peşə təhsili müəssisələrinə qəbulun yeni başladığı zamanda belə tədbirlərinin əhəmiyyətini vurğulayıblar. Onlar peşə təhsilinin təbliği üzrə tədbirlərin davamlı təşkilinin zəruriliyini diqqətə çatdırdıblar.
Qəbələ Dövlət Peşə Təhsil Mərkəzində infotur da həyata keçirilib. İştirakçılar emalatxanalar, dəzgahlar, sinif otaqları, ümumi olaraq mərkəzin ərazisi, Təhsil Mərkəzinin maddi-texniki bazası ilə yaxından tanış olub, master-klasslarda iştirak ediblər. Onlar “Aşpaz”, “ Qənnadçı-şirniyyatçı”, “Dülgər”, “Qaynaqçı”, “Dərzi”, “Xalçaçı” və digər ixtisaslar üzrə ətraflı məlumatlar alıblar.
Mərkəzdə həm turizim, həm aqrar, həm də sənayenin digər sahələri üzrə kadrların hazırlanması haqda ətraflı məlumat verildikdən sonra Qəbələ DPTM-nin uğurlu məzunları peşə sahələri üzrə bacarıqlara necə sahib ola biləcəkləri haqqında öz məsləhət və tövsiyyələrini verib və uğur hekayələrini danışıblar.
Qeyd edək ki, sözügedən layihə çərçivəsində tədbirlər 01-10 avqust 2023-cü il tarixilərində həyata keçirilib. Tədbirlərdə Qəbələ rayonunda fəaliyyət göstərən 8 ümumtəhsil məktəbindən 300-dən çox şagird iştirak edib.
