Bu gün “Qızıl top” (“Ballon d’Or”) mükafatının sahibi müəyyənləşəcək.Virtualaz.org saytı xəbər verir ki, mükafat uğrunda Kriştiano Ronaldo (“Real” (Madrid), Portuqaliya), Lionel Messi (“Barselona”, Argentina) və Manuel Noyer (“Bavariya”, Almaniya) mübarizə aparırlar.
İsveçrənin Sürix şəhərində baş tutacaq tədbir Bakı vaxtı ilə saat 20:00-da başlayacaq. Buna qədər Ronaldo 2 (2008, 2013), Messi 4 dəfə (2009, 2010, 2011, 2012) “Qızıl top”a sahib çıxıb. 28 yaşlı əlcək sahibinə isə bu mükafat hələ nəsb olmayıb.
Digər mükafatlara gəldikdə isə ən yaxşı qadın futbolçu adına almaniyalı Nadin Kessler, braziliyalı Marta və ABŞ yığmasından Embi Uombax namizəddirlər. Ən yaxşı kişi baş məşqçi üçün mükafata Karlo Ancelotti (“Real”, Madrid), Yoahim Löv (Almaniya) və Dieqo Simeone (“Atletiko”, Madrid) iddialıdır.
Almaniyalı Ralf Kellermann (“Volfsburq”, Almaniya), Maren Maynert (Almaniya gənclər yığması) və ya Norio Sasaki (Yaponiya millisi) ən yaxşı qadın baş məşqçi seçiləcəklər.
Ən yaxşı qol üçün nəzərdə tutulan Ferents Puşkaş, eləcə də “Fair Play” mükafatı da gecədə təqdim olunacaq.
