“Azərbaycanda parlament seçkiləri yaxınlaşdıqca ölkəmizə qarşı növbəti təzyiq dalğası güclənir”. Bunu Səs TV-yə açıqlamasında Beynəlxalq Münasibətlərin Araşdırılması Mərkəzinin sədri, politoloq Rufiz Qonaqov deyib.
Onun sözlərinə görə, Azərbaycanda taleyüklü tədbirlərin keçirilməsi ərəfəsi ölkəmizə qarşı ikili standartlardan çıxış etmələri ilə seçilən bəzi beynəlxalq qurumlar qərəzli fəaliyyətlərini genişləndirirlər: “Avropa Parlamentinın qərarı qərəzli yanaşmaların tərkib hissəsidir. Vətəndaş cəmiyyəti institutları olaraq bu qətnaməni qərəzli və böhtan hesab edirik. Bu qətnamə bir daha dünyada ikili standartların hökm sürdüyünü göstərir. Qətnamədə göstərilən insan hüquqları, demokratiya, media azadlığı, siyasi partiyalar və vətəndaş cəmiyyəti və seçki məsələləri ilə bağlı müddəalar, iradlar, ittihamların heç biri reallığa uyğun deyil”.
R.Qonaqov Azərbaycanda kifayət qədər demokratik azadlıqların mövcud olduğunu bildirdi: “Ölkəmizdə insan hüquq və azadlıqları tam şəkildə təmin olunur. Media tam azad və sərbəst şəkildə fəaliyyət göstərir. Bu gün ölkəmizdə 50-dən artıq siyasi partiya, 3 mindən artıq QHT və çoxsaylı media qurumları fəaliyyət göstərir. Belə bir şəraitdə ölkəmizlə bağlı bu qətnamənin qəbuluna çox təəssüflənirik və təəssüflənməklə bərabər bunu qərəzli sayırıq və pisləyirik”.
