Avropa Parlamenti 1915-ci il hadisələrinin soyqırım kimi tanınmasını nəzərdə tutan layihəni qəbul edib. Məsələyə 
münasibət bildirən QHT sədri, media ekspert Səbuhi Abasov bunun birtərəfli və qərəzli qərar olduğunu dedi: “Roma Papasının qərəzli mövqeyindən sonra Avropa Parlamentinin də bu tip qərar verməsi heç də təəccüblü deyil. Xocalı soyqırımı günü Avropa Parlamentinin prezidenti Azərbaycana müraciət edərək insan hüquqlarının pozulduğunu qeyd etməsi əslində bu qurumun rəhbərliyinin mövqeyini ortaya qoymuşdu.
Yüzlərlə qətlə yetirilən azərbayclıların, qaçqın və məcburi köçkünlərin insan hüquqları nədənsə Avropa Parlamentinə maraqlı deyil. Düzdü, bu prosesdə birmənalı şəkildə erməni lobbisinin böyük “xidmətləri” var. Hesab edirəm ki, türkdilli ölkələr diaspor sahəsində ciddi iş birliyi yaratmalı və bu sahədə fəaliyyətini daha da artırmalıdırlar. İstənilən halda zərbə sadə ermənilərə dəyəcək. Cəhalət və səfalət içində yaşayan, öz ölkələri yoxsulluğu görə tərk edən sadə ermənilərə sağlam qonşuluq əlaqələri yeganə çıxış yolu idi. Lakin onların bu arzularını Roma Papası, Avropa Parlamenti kimi “demokratik” təsisatlar tamamilə məhv etdilər. Bundan sonra ermənilər daha böyük iqtisadi və siyasi itkilər gözləyir.
Bu mənada hesab edirəm ki, layihəyə Türkiyə heç bir əhəmiyyət verməyəcək. Əslində Türkiyə neçə illərdir ki, öz arxivlərini dünya tarixçilərinin üzünə açıq olduğunu bəyan edib və Ermənistanında eyni addım atmasını təklif edib. Təbii ki, əgər Ermənisatnın arxivi varsa. Lakin Ermənistan bu mövqe ilə razılaşmır. Səbəb isə bəllidir. Həqiqətlər ortada olacaq, həmdə Türkiyənin xeyrinə. ”
