“İkinizi də Allah öldürsün, səni də, Hitleri də…”

Milli kinomuzun misilsiz incisi sayılan “Bizim Cəbiş müəllim” filmindən bu məşhur frazanı təsadüfən xatırlamadım. Bu gün “Cəbiş müəllimin həyat yoldaşı”, xalq artisti, tanınmış aktrisa Şəfiqə Məmmədovanın doğum günüdür.

Şəfiqə xanım bir-birindən gözəl, yaddaqalan obrazlar yaradan aktrisalarımızdandır.

1968-ci ildə Akademik Dram Teatrında fəaliyyətə başlayan aktrisa “Hamlet”də Gertruda, “Mənim günahım”da Nurcahan, “Aydın”da Gültəkin, “Dəli yığıncağı”nda Sona kimi parlaq obrazlar yaradıb.

Şəfiqə Məmmədova “Dədə Qorqud”da Burla xatun, “İstintaq”da Gülya, “Bizim Cəbiş müəllim”də Cəbişin arvadı, “Ad günü”ndə Fəridə, “Çarvadarların izi ilə”də Səriyyə kimi rollarla özünə çoxsaylı tamaşaçı sevgisi qazanıb.

Aktrisanın yaratdığı obrazlar müxtəlif dönəmlərdə ən yüksək mükafatlara layiq görülüb.

Sevilən, cazibədar və hər zaman təravətli olan Şəfiqə xanımı biz də təbrik elədik. Hər zaman mətbuatdan uzaq olan xalq artisti bizi qırmadı, suallarımızı cavablandırdı.

Şəfiqə Məmmədovanın Publika.az-a müsahibəsini təqdim edirik.

– Doğum gününüzü təbrik edirik, necəsiniz, hansı əhval-ruhiyyədəsiniz?

– Çox yaxşıyam, səhər tezdən hər kəs mənə zəng edir, təbriklərini çatdırır, xoş sözlər söyləyir. İndi də sizdən gözəl sözlər eşidirəm, deyirsiniz ki, “bir dənəsiniz”. Bir aktrisa üçün bundan gözəl söz nə ola bilər?

–  Siz ən gözəl sözlərə layiqsiniz. Doğum günlərinizi təmtəraqla qeyd etməyi sevirsinizmi?

– Ailəmlə, uşaqlarım və həyat yoldaşımla bərabər qeyd edəcəyik. Sevinirəm ki, heç vaxt unudulmuram, həmişə diqqət mərkəzində oluram.

– Biz sizi çox istəyirik, sadəcə, mətbuatdan qaçırsınız deyə sizi narahat etmək istəmirik.

– Elə mən də jurnalistləri çox istəyirəm. Sizlərlə tez-tez ünsiyyətdə olmamağımın da səbəbi aramızdakı sevgini qorumaqdır. Buna görə sizlərlə məsafə saxlayıram.

– Filmlərdə yaratdığınız hər rol bizlər üçün çox dəyərli hədiyyədir. Bilmək istərdik, Şəfiqə xanımın ən çox sevdiyi hədiyyələr hansıdır?

– Mart ayında doğulmuşam və bəlkə də bundan irəli gəlir, Vaqif Mustafazadənin “Mart” kompozisiyasını dinləyəndə zövq alıram. O musiqini dinləyəndə bütün həyat yolum gözlərim önündə canlanır. Bir də əlvan tülpanları çox sevirəm. Sevdiyim hədiyyələri də sevdiklərimdən alıram. Mən məhəbbətə bağlı insanam, sevgi mənim üçün ən böyük hədiyyədir.

– Bu günə qədər istər səhnədə, istərsə də kinoda  saysız-hesabsız rollar yaratmısınız. Maraqlıdır, ən çox sevdiyiniz obrazınız hansıdır?

– Fərq qoya bilmirəm. Onu da deyim ki, səhnədə saysız-hesabsız rollar yaratmışam. Sonuncu dəfə “Dəli yığıncağı” tamaşasında oynamışam.

– Şəfiqə xanım, niyə teatrla müqayisədə kinoda az çəkilmisiniz?

–  Düzdür, teatrda yaratdığım rolların beş faizini kinoda oynaya bilməmişəm. Buna görə çox peşmanam. Keçmişi xatırlayanda  buna görə təəssüf hissi keçirirəm. Ekran elədir ki, hər zaman qalır. Kino çox çəkili, sanballı sənət növüdür. Hərdən fikirləşirəm ki, kaş teatrın repertuarını böyük ekrana köçürmək mümkün olaydı. İşlərimin çoxluğu  məni filmlərdən uzaq saldı. Hansı ki, daha çox filmlərdə çəkilə bilərdim. Amma bu rolları oynamaq başqa aktrisalara qismət oldu.

– Bəs çəkildiyiniz filmlər arasında ən çox sevdiyiniz hansıdır?

– Deməyə çətinlik çəkirəm. Sizə bir söz deyim, çox vaxt öz filmlərimə baxmıram. Sevimli rollarım var. Hamısını sevə-sevə yaratmışam, ekrandadır. Hamısı mənə əzizdir, doğmadır. Mən öz filmlərimə baxmıram.

– Niyə?

– Daha doğrusu, baxa bilmirəm. Çünki mənə elə gəlir ki, o rolları daha zəngin yarada bilərdim. Daha çox analiz edib daha möhtəşəm yaradardım. Həm də nostalji hisslər yaşayıram. Elə anlar olur ki, o illərin töhfələri, o illərin yaradıcılıq mühitini xatırlayıram. Xatirələr çox itidir. Amma gözüm yoldadır.

– Deməli, yaxın zamanlarda yenidən gözəl bir filmlə bizi sevindirəcəksiniz?

– Mənə aid elə bir ssenari olsa, mütləq çəkiləcəm. Artıq bu istiqamətdə söhbətlər də gedir.

– İndiyə qədər xeyli tərəf müqabilləriniz olub. Onlardan kimləri daha çox xatırlayırsınız?

– Əlbəttə, mənim çox gözəl tərəf müqabillərim olub. Həsənağa Turabov mənim tərəf müqabilim, həm də dostum idi. Səməndər Rzayev çox gözəl və professional tərəf müqabili idi. Həqiqətən çox peşəkar idi. Onunla çox gözəl rollar oynamışam. Hamlet Xanızadə, İsmayıl Osmanlı… Mən çox sənətçilər görmüşəm, onlarla səhnəni bölüşmüşəm. Ona görə mənim teatra gəlişim çox güclü olub. Tahir Salahov tamaşalarda rəssam kimi çıxış edirdi, Qara Qarayev tamaşalara musiqilər yazırdı… Bax belə bir yaradıcılıq dövrüm olub. Doğrudur, bu, çox uzun çəkmədi, amma çox maraqlı idi. Hamıya özüm oynadığım rolları arzulayıram.

– Bəs bu gün kiminlə tərəf müqabili olmaq istəyirsiniz?

– Bu suala cavab verməkdə çətinlik çəkirəm.

– Xoşbəxt aktrisa, xoşbəxt ana, xoşbəxt həyat yoldaşı – ən çox hansında özünüzü tapırsınız?

– Xoşbəxtəm ki, ailəmin xanımıyam.

– Biz də bir tamaşaçı kimi xoşbəxtik ki, sizin kimi füsünkar, qüdrətli, təbii oyunu ilə hər zaman bizləri riqqətə gətirən belə gözəl aktrisamız var. Doğum gününüz mübarək olsun!

– Təşəkkürlər!